വേറിട്ട പ്രമോഷനുമായി മുന്തിരി മൊഞ്ചൻ ടീം
Mail This Article
പ്രമോഷന്റെ കാര്യത്തില്‍ ബിഗ് ബജറ്റ് സിനിമകൾക്കൊപ്പം ഒരു ചെറിയ സിനിമ. വിജിത്ത് നമ്പ്യാർ ഒരുക്കുന്ന മ്യൂസിക്കൽ എന്റർടെയ്നർ മുന്തിരി മൊഞ്ചനാണ് മാർക്കറ്റിങ് പ്രമോഷനുകളിലൂടെ ശ്രദ്ധനേടുന്നത്. കേരളത്തിലെ തീവണ്ടിയിലും ചിത്രത്തിന് പരസ്യം ഒരുക്കുകയാണ് അണിയറ പ്രവർത്തകർ.
പരശുരാമന്റെ തോളിലേറി ഇനി കേരളത്തിലൂടെ മുന്തിരി മൊഞ്ചനും സഞ്ചരിക്കും. ട്രെയിനിലെ പോസ്റ്ററുകളുടെ ചിത്രവും പുറത്തുവന്നിരുന്നു. ഒരു ട്രെയിന്‍ യാത്രയ്ക്കിടയിലാണ് വിവേക് വിശ്വനാഥും ദീപികയും കണ്ടുമുട്ടുന്നത്. ആ കണ്ടുമുട്ടലിന് ശേഷം ഇവര്‍ക്കിടയിലേക്ക് മറ്റൊരാളെത്തുന്നതും തുടര്‍ന്നുള്ള സംഭവങ്ങളുമാണ് ചിത്രത്തിന്റെ പ്രമേയം.
വിശ്വാസ് മൂവി പ്രൈവറ്റ് ലിമിറ്റഡിന്റെ ബാനറില്‍ പി.കെ. അശോകന്‍ നിര്‍മിക്കുന്ന ചിത്രത്തിന് കഥയും തിരക്കഥയും സംഭാഷണവും ഒരുക്കിയിട്ടുള്ളത് മനു ഗോപാലും മൊഹറലി പൊയ്ലുങ്ങല്‍ ഇസ്മായിലുമാണ്. ഛായാഗ്രഹണം ഷാന്‍ ഹാഫ്‌സാലി. പശ്ചാത്തല സംഗീതം റിജോഷ്.
