മിനിമം ഒരു മാസ്ക് എങ്കിലും ഉപയോഗിക്കാമായിരുന്നു: അജു വർഗീസ്
Mail This Article
റിയാലിറ്റി ഷോ താരം രജിത് കുമാറിനെ സ്വീകരിക്കാന്‍ നിയന്ത്രണങ്ങള്‍ ലംഘിച്ച് ആളുകള്‍ വിമാനത്താവളത്തില്‍ എത്തിയ സംഭവത്തില്‍ പ്രതികരണവുമായി നടന്‍ അജു വര്‍ഗീസ്. ആരാധന വ്യക്തിതാൽപര്യമാണെന്നും പക്ഷേ ഒരു മാസ്ക് എങ്കിലും വന്നവർക്ക് ഉപയോഗിക്കാമായിരുന്നെന്ന് താരം പറഞ്ഞു.
‘ആരാധന ഓരോ വ്യക്തിയുടെ ഇഷ്ടവും താല്പര്യവുമാണ്, പക്ഷേ മിനിമം ഒരു മാസ്ക് എങ്കിലും ഉപയോഗിക്കാമായിരുന്നു.’ വിമാനത്താവളത്തില്‍ തടിച്ചുകൂടിയ ആള്‍ക്കാരുടെ ഫോട്ടോ സഹിതം പങ്കുവച്ച് അജു കുറിച്ചു.
ഇത് കൂടാതെ ബവറേജസ് ഷോപ്പിലെ ജനക്കൂട്ടത്തിന്റെ ചിത്രവും അദ്ദേഹം പങ്കുവച്ചിട്ടുണ്ട്. കൊറോണ ബാധയിൽ ജാഗ്രത പുലർത്തേണ്ട സമയത്ത് ഇത്തരത്തിലെ കൂട്ടംകൂടി നിൽപ്പ് നൽകുന്ന വെല്ലുവിളികളെപ്പറ്റിയുള്ള ഓർമ്മപ്പെടുത്തലാണ് ഈ ചിത്രങ്ങൾ. താരാരാധന മൂത്ത് ജനം എയർപോർട്ടിൽ തടിച്ചു കൂടിയ ചിത്രം പോസ്റ്റ് ചെയ്തതിന് തൊട്ടുപിന്നാലെയാണ് ബവറേജിന്റെ ചിത്രവും താരം പങ്കുവച്ചത്.