നമ്പി നാരായണന്റെ ജീവിതകഥ പറയുന്ന റോക്കട്ട്രിയിൽ മാധവനൊപ്പം ഷാരൂഖ് ഖാനും സൂര്യയും
Mail This Article
മുന്‍ ശാസ്ത്രജ്ഞനും ഐ.എസ്.ആര്‍.ഒയില്‍ എന്‍ജിനീയറുമായിരുന്ന നമ്പി നാരായണന്റെ ജീവിതം ആസ്പദമാക്കിയുള്ള റോക്കട്ട്രി: ദ് നമ്പി എഫക്ട്‌ എന്ന ചിത്രത്തിൽ ബോളിവുഡ് കിങ് ഷാരൂഖ് ഖാനും അഭിനയിക്കുന്നു. മാധവന്‍ നായകനായി അദ്ദേഹം തന്നെ സംവിധാനം ചെയ്യുന്ന ചിത്രത്തില്‍ അതിഥി വേഷ‌മാണ് ഷാരൂഖ് ചെയ്യുന്നത്.
ഈ വേഷം സിനിമയില്‍ വളരെ പ്രധാനപ്പെട്ടതാണെന്നും അതിന് ഷാരൂഖ് തന്നെയാണ് ഏറ്റവും ചേരുകയെന്നും മാധവന്‍ ഒരു സ്വകാര്യ മാധ്യമത്തിന് നല്‍കിയ അഭിമുഖത്തില്‍ പറഞ്ഞു. തമിഴ്, ഹന്ദി, ഇംഗ്ലീഷ് ഭാഷകളിലായി ഒരുങ്ങുന്ന ചിത്രത്തിന്റെ തമിഴ് പതിപ്പിൽ സൂര്യയായിരിക്കും ഷാരൂഖിന് പകരം അഭിനയിക്കുകയെന്നും റിപ്പോര്‍ട്ടുകള്‍ ഉണ്ട്.
നാലുവര്‍ഷമായി അണിയറയില്‍ ഒരുങ്ങുന്ന ചിത്രം സംവിധാനം ചെയ്യുന്നതും മാധവന്‍ തന്നെയാണ്. ട്രൈ കളര്‍ ഫിലീസിന്റെ ബാനറില്‍ സരിത മാധവനും വര്‍ഗീസ് മൂലന്‍ പിക്‌ചേഴ്‌സിന്റെ ബാനറില്‍ വര്‍ഗീസ് മൂലനും വിജയ് മൂലന്‍ ടാക്കീസിന്റെ ബാനറില്‍ വിജയ് മൂലനും ചേര്‍ന്നാണ് ചിത്രം നിര്‍മിക്കുന്നത്.
ക്യാപ്റ്റൻ എന്ന മലയാള ചിത്രം ഒരുക്കിയ സംവിധായകന്‍ പ്രജേഷ് സെന്‍ ചിത്രത്തിന്റെ കോ ഡയറക്ടറാണ്.
