മണലാരണ്യത്തിൽ ഫോട്ടോഷൂട്ടുമായി തമന്ന പ്രമോദ്; ചിത്രങ്ങൾ

ഫോറൻസിക് സിനിമയിൽ ഇരട്ടവേഷത്തിലെത്തി ആരാധകരെ അദ്ഭുതപ്പെടുത്തിയ താരമാണ് തമന്ന പ്രമോദ്. തമന്നയുടെ പുതിയ ഫോട്ടോഷൂട്ട് ചിത്രങ്ങളാണ് ഇപ്പോൾ വൈറൽ. ദുബായിെല മണലാരണ്യത്തിൽ അതിസുന്ദരിയായി താരം പ്രത്യക്ഷപ്പെടുന്നു.

അബുദാബിയിൽ അച്ഛനമ്മമാരോടൊപ്പം സ്ഥിര താമസമാക്കിയ തമന്ന പ്രമോദ് തീർത്തും അവിചാരിതമായാണ് ഫോറൻസിക് എന്ന സിനിമയിലേക്ക് എത്തുന്നത്. അഭിനയമോഹം മനസ്സിൽ സൂക്ഷിച്ചിരുന്ന തമന്ന, ടിക്കറ്റോക് വിഡിയോകളിലൂടെ സൈബർ ലോകത്ത് സജീവമായിരുന്നു. തുടർന്നാണ് സിനിമയിലേക്കുള്ള വഴി തെളിയുന്നത്. അങ്ങനെ അബുദാബിയിൽ നിന്നും കേരളത്തിലെത്തി  ഒാഡിഷനിലൂടെ ഫോറൻസിക്കിലെ പ്രധാന കഥാപാത്രങ്ങളിലൊന്നായ നവ്യയായി തെരഞ്ഞെടുക്കപ്പെട്ടു. 

എന്നാൽ ഷൂട്ടിന് മുൻപ് ഡയറക്റ്റർമാരായ അഖിൽ പോൾ, അനസ് ഖാൻ എന്നിവർ  തമന്നയോട് ആവശ്യപ്പെട്ടത് നീണ്ട മുടി മുറിക്കണം എന്നാണ്. കഥാപാത്രത്തിന്റെ മികവിന് വേണ്ടി ഏറെ വിഷമത്തോടെയാണ് അന്ന് മുടി മുറിച്ചത് എങ്കിലും ഫോറൻസിക് സിനിമ തിയറ്ററിൽ കണ്ടപ്പോൾ, ആളുകൾ തന്റെ കഥാപാത്രത്തിന് നൽകിയ സ്വീകരണം കണ്ടപ്പോൾ ആ വിഷമമെല്ലാം മാറി എന്ന് തമന്ന പറയുന്നു. 

പാലക്കാട് കുമരനെല്ലൂർ ആണ് തമന്നയുടെ സ്വദേശം. തമന്നയുടെ അച്ഛനും അമ്മയും അബുദാബിയിൽ എത്തിയിട്ട് വർഷങ്ങളായി. അബുദാബിയിൽ ഇപ്പോൾ എട്ടാം ക്ലാസിലാണ് താരം പഠിക്കുന്നത്.