സൗബിന്റെ നായികയായി നമിത പ്രമോദ്; പൂജ വിഡിയോ

ബോബൻ സാമുവൽ സംവിധാനം ചെയ്യുന്ന പുതിയ ചിത്രത്തില്‍ സൗബിൻ ഷാഹിർ നായകനാകുന്നു. നമിത പ്രമോദ് ആണ് നായിക. അബാം മൂവീസിന്റെ ബാനറിൽ എബ്രഹാം മാത്യുവാണ് ചിത്രം നിർമിക്കുന്നത്. ചിത്രത്തിന്റെ പൂജയും സ്വിച്ചോൺ കർമവും അന്നമനടക്കടുത്ത് കൊമ്പിടിയിൽ നടന്നു. അബാം മൂവിസിന്റെ പതിമൂന്നാമത് ചിത്രമാണിത്. ഫീൽഗുഡ് ഫാമിലി എന്റർടെയ്നർ ഗണത്തിലുള്ള ചിത്രത്തിന് ജക്സൺ ആന്റണി കഥ എഴുതുന്നു. അജീഷ് പി. തോമസിന്റേതാണ് തിരക്കഥ.

സ്നേഹത്തിന്റെയും കടപ്പാടുകളുടെയും ബന്ധങ്ങളുടെയും നടുവിൽപ്പെട്ടു പോകുന്ന ചെറുപ്പക്കാരന്റെ കഥയാണ് ചിത്രം പറയുന്നത്. സജീവൻ എന്ന കെഎസ്ആർടിസി ബസ് കണ്ടക്ടറുടേയും മെഡിക്കൽ ഷോപ്പ് ജീവനക്കാരിയായ ബിജി മോളുടേയും ജീവിതത്തിലൂടെയാണ് കഥാ പുരോഗതി. സൗബിൻ ഷാഹിറും നമിതാ പ്രമോദുമാണ് ഈ കഥാപാത്രങ്ങളെ അവതരിപ്പിക്കുന്നത്.

ദിലീഷ് പോത്തൻ, മനോജ്, കെ.യു., ശാന്തികൃഷ്ണ, ദർശന സുദർശൻ, വിനീത് തട്ടിൽ തുടങ്ങിയവരും പ്രധാന വേഷങ്ങളിലെത്തുന്നു. സംഗീതം ഔസേപ്പച്ചൻ, ഛായാഗ്രഹണം വിവേക് മേനോൻ, എക്സിക്യൂട്ടീവ് പ്രൊഡ്യൂസർ അമീർ കൊച്ചിൻ, പ്രൊഡക്‌ഷൻ കൺട്രോളർദീപക് പരമേശ്വരൻ, കലാ സംവിധാനം സഹസ് ബാല, മേക്കപ്പ് ജിതേഷ് പൊയ്യ, കോസ്റ്റ്യൂം ഡിസൈനർ അരുൺ മനോഹർ, സ്റ്റിൽസ് ഗിരിശങ്കർ, മാർക്കറ്റിംഗ് ബിനു ബ്രിങ്ഫോർത്ത്, പിആർഒ മഞ്ജു ഗോപിനാഥ്, പി.ശിവപ്രസാദ്, വാഴൂർ ജോസ്, ഡിസൈൻസ് മാജിക് മൊമന്റ്സ്. ഓഗസ്റ്റ് ആദ്യവാരത്തിൽ ചിത്രീകരണമാരംഭിക്കുന്ന ഈ ചിത്രത്തിൻ്റെ ചിത്രീകരണം മാള,  അന്നമനട, കൊമ്പിടി, മുളന്തുരുത്തി, ഭാഗങ്ങളിലായി പൂർത്തിയാകും.