മഴയിൽ നനഞ്ഞ് റോഷന്റെയും പ്രിയയുടെയും പ്രണയം; കയ്യടി

ഒമര്‍ ലുലു സംവിധാനം ചെയ്ത ‘ഒരു അഡാർ ലൗ’വിലെ ‘മുന്നാലേ പോന്നാലേ’ എന്ന ഗാനത്തിന്റെ വിഡിയോ എത്തി. പ്രിയ പ്രകാശ് വാര്യരും റോഷൻ അബ്ദുൾ റൗഫുമാണൂ ഗാനരംഗത്തിൽ എത്തുന്നത്. ഹരിചരാണാണ് ആലാപനം. പേളി മാണിയുടെ വരികള്‍ക്ക് ഷാൻ റഹ്മാൻ സംഗീതം നൽകിയിരിക്കുന്നു. 

മനോഹരമായ പ്രണയഗാനമായാണ് ‘മുന്നാലെ പോന്നാലേ’ എന്ന ഗാനം എത്തുന്നത്. ചിത്രം വ്യാപകമായ വിമർശനങ്ങള്‍ നേരിടേണ്ടി വന്നെങ്കിലും ഗാനങ്ങൾക്കെല്ലാം മികച്ച പ്രതികരണമാണു ലഭിക്കുന്നത്. ഏഴുഗാനങ്ങളുണ്ട് ചിത്രത്തിൽ. വിനീത് ശ്രീനിവാസൻ, സത്യജിത്ത്, നീതു നടുവേത്ത്, സൂരജ് സന്തോഷ്, ശ്രുതി ശിവദാസ്, സച്ചിൻ വാര്യർ, ഹിഷാം അബ്ദുൾ വഹാബ്, ജീനു നസീർ എന്നിവരും ഗാനങ്ങൾ ആലപിച്ചിട്ടുണ്ട്. ചിത്രത്തിലെ മാണിക്യമലരായ പൂവി എന്ന ഗാനം ആഗോളതലത്തിൽ തന്നെ ശ്രദ്ധ നേടിയിരുന്നു. ഏറ്റവും കൂടുതൽ ആളുകള്‍ കണ്ട മലയാളം ഗാനങ്ങളുടെ പട്ടികയിൽ മുന്‍പന്തിയിലാണ് ‘മാണിക്യമലർ’. ലൈക്കുകൾ കൊണ്ട് ഈ ഗാനം ശ്രദ്ധേയമായപ്പോൾ ഫ്രീക്ക് പെണ്ണേ എന്ന ഗാനം ശ്രദ്ധേയമായത് ഡിസ്‌ലൈക്കുകൾ കൊണ്ടായിരുന്നു. എന്നാൽ പിന്നീടു വന്ന ഗാനങ്ങളെല്ലാം തന്നെ ഏറെ ശ്രദ്ധനേടിയിരുന്നു.

ഏറ്റവും ഒടുവിൽ പുറത്തുവന്ന മുന്നാലെ പിന്നാലെ എന്നു തുടങ്ങുന്ന ഗാനവും അങ്ങനെ തന്നെ. റിലീസ് ചെയ്തു മണിക്കൂറുകൾക്കകം തന്നെ നാലുലക്ഷത്തോളം ആളുകളാണു ഗാനം യൂട്യൂബില്‍ കണ്ടത്. റോഷനും പ്രിയയും നല്ല ജോഡികൾ തന്നെയാണെന്നാണു ഭൂരിഭാഗം പേരുടെയും പ്രതികരണം. പേളിമാണിയോടുള്ള ആരാധന കൊണ്ടാണു ഗാനം കാണുന്നതെന്നും പറയുന്നവരും നിരവധിയാണ്. ഒരു അഡാർ ലൗവിലെ മറ്റു ഗാനങ്ങള്‍ പോലെ തന്നെ ഏറെ ശ്രദ്ധ നേടുകയാണ് മുന്നാലെ പോന്നാലെ എന്ന ഗാനവും.