പ്രാച്ചിക്കും ഇനിയയ്ക്കും ഒപ്പം അനു സിത്താരയും: വൈറലായി മാമാങ്കം നായികമാരുടെ നൃത്തം

മമ്മൂട്ടി നായകനായെത്തിയ മെഗാബജറ്റ് ചിത്രമായ മാമാങ്കത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. അതിൽ ആദ്യം റിലീസ് ചെയ്ത ‘മൂക്കുത്തി മൂക്കുത്തി കണ്ടില്ല...’ എന്ന ഗാനം ആരാധകരുടെ എണ്ണത്തിൽ റെക്കോർഡ് ഇട്ടിരുന്നു. ചിത്രത്തിൽ പ്രാചി തെഹ്ലാനും ഇനിയയും ചേർന്നാണ് ഈ പാട്ടിനു ചുവടു വച്ചിരിക്കുന്നത്. ഖത്തറിൽ മാമാങ്കത്തിന്റെ പ്രമോഷന്റെ ഭാഗമായി നടന്ന പരിപാടിയിൽ ചിത്രത്തിലെ നായികമാർ ഇതേ ഗാനത്തിന് ചുവടു വച്ചതിന്റെ വിഡിയോ ആണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. 

ഇനിയയ്ക്കും പ്രാചി തെഹ്ലാനുമൊപ്പം അനുസിത്താരയുമുണ്ട് വിഡിയോയിൽ. പ്രാചി തെഹ്ലാൻ ആണ് സമൂഹമാധ്യമങ്ങളിൽ വിഡിയോ പങ്കു വച്ചത്. ഇതോടെ പ്രിയ താരങ്ങളുടെ ഡാൻസിന്റെ വിഡിയോ ആരാധകർ ഏറ്റെടുത്തു. ആലാപനശൈലി കൊണ്ടും ദൃശ്യമികവു കൊണ്ടും ഗാനം ഏറെ ശ്രദ്ധിക്കപ്പെട്ടിരുന്നു. റഫീഖ് അഹമ്മദ് രചിച്ച വരികൾക്ക് എം.ജയചന്ദ്രനാണ് ഈണം പകർന്നത്. ശ്രേയ ഘോഷാൽ ഗാനം ആലപിച്ചു. 

ചരിത്ര പശ്ചാത്തലത്തിൽ ഒരുങ്ങിയ സിനിമ എം.പദ്മകുമാർ ആണ് സംവിധാനം ചെയ്തിരിക്കുന്നത്. വേണു കുന്നപ്പള്ളിയാണ് നിർമാണം. മമ്മൂട്ടിക്ക് പുറമെ ഉണ്ണി മുകുന്ദൻ, കനിഹ, സിദ്ദിഖ്, തരുൺ അറോറ, സുദേവ് നായർ, സുരേഷ് കൃഷ്ണ, രതീഷ് കൃഷ്ണ, മാസ്റ്റർ അച്യുതൻ എന്നിവരും ചിത്രത്തിൽ മുഖ്യ കഥാപാത്രങ്ങളെ അവതരിപ്പിച്ചു.