സണ്ണി വെയിന്റെ പ്രണയത്തിനൊപ്പം ഗോവിന്ദ് വസന്തയുടെ സംഗീതം ; വിഡിയോ

സണ്ണി വെയിൻ നായകനായെത്തുന്ന ‘ചെത്തി മന്ദാരം തുളസി’ എന്ന ചിത്രത്തിലെ ഗാനത്തിന്റെ ടീസർ പുറത്തിറങ്ങി. നിവിൻ പോളിയാണ് ടീസർ റിലീസ് ചെയ്തത്. ‘വീഴുമീ....’ എന്നു തുടങ്ങുന്ന ഗാനത്തിന് വരികളൊരുക്കിയത് റഫീക്ക് അഹമ്മദാണ്. ഗോവിന്ദ് വസന്ത ഈണം പകർന്നിരിക്കുന്നു. തൈക്കൂടം ബ്രിഡ്ജ് എന്ന സംഗീത ബാൻഡിലൂടെ ശ്രദ്ധിക്കപ്പെട്ട് പിന്നണിഗാനരംഗത്തെത്തിയ വിപിന്‍ ലാലാണ് ഗാനം ആലപിച്ചിരിക്കുന്നത്. ടീസറിന് മികച്ച പ്രേക്ഷക സ്വീകാര്യതയാണ് ലഭിക്കുന്നത്. 

‘പ്രണയ മീനുകളുടെ കടൽ’ എന്ന സിനിമയിലൂടെ മലയാളികൾക്ക് സുപരിചിതയായ റിഥി കുമാർ ആണ് ചിത്രത്തിലെ നായിക. സണ്ണി വെയിനും റിഥിയും തമ്മിലുള്ള പ്രണയരംഗങ്ങളാണ് ടീസറിലുള്ളത്. രാഹുൽ.ആർ, ജയ് ജനാർദ്ധനൻ, പി.ജിംഷാർ എന്നിവർ ചേർന്നാണ് ചിത്രം സംവിധാനം ചെയ്യുന്നത്. 

സംവിധായകൻ ആർ.എസ്.വിമൽ നിർമാണ രംഗത്തേയ്ക്കു ചുവടു വയ്ക്കുന്ന ചിത്രമാണ് ‘ചെത്തി മന്ദാരം തുളസി’. ആർ.എസ് വിമൽ ഫിലിംസും യുണൈറ്റഡ് ഫിലിം കിങ്‌ഡവും ചേർന്നാണ് ചിത്രത്തിന്റെ നിർമാണം. പി.ജിംഷാറിന്റേതാണ് തിരക്കഥ. വിഷ്ണു പണിക്കരാണ് ഛായാഗ്രഹണം.