‘ബിലാലിനു വേണ്ടി ഞങ്ങളും’; ബിഗ് ബി രണ്ടാം ഭാഗത്തെക്കുറിച്ച് ഗോപി സുന്ദർ

മമ്മൂട്ടിയുടെ എക്കാലത്തെയും മികച്ച ചിത്രങ്ങളിലൊന്നായ ബിഗ് ബിയുടെ രണ്ടാം ഭാഗം വരുന്നു എന്ന പ്രതീക്ഷ നൽകി സംഗീതസംവിധായകൻ ഗോപി സുന്ദർ. ‘ബിലാൽ’ എന്നാണ് ചിത്രത്തിനു പേര് നൽകിയിരിക്കുന്നത്. അമൽ നീരദിനൊപ്പമുള്ള ചിത്രം പങ്കുവച്ചുകൊണ്ട് ബിലാലിനു വേണ്ടി തങ്ങൾ ഒരുമിച്ചു എന്നും എല്ലാവരുടയും പ്രാർഥനകൾ കൂടെയുണ്ടാകണം എന്നും ഗോപി സുന്ദർ കുറിച്ചു. 

ബിഗ് ബി എന്ന ചിത്രത്തിൽ മമ്മൂട്ടി അവതരിപ്പിച്ച ബിലാൽ ജോൺ കുരിശിങ്കൽ എന്ന കഥാപാത്രത്തിന് ഇപ്പോഴും ആരാധകർ ഏറെയാണ്. ഇപ്പോൾ ചിത്രത്തിന്റെ രണ്ടാം ഭാഗത്തിനു വേണ്ടിയുള്ള കാത്തിരുപ്പിലാണ് ആരാധകർ. ബിഗ് ബിയുടെ രണ്ടാം ഭാഗം ഉടൻ വരുമെന്ന് മമ്മൂട്ടിയും നേരത്തെ അറിയിച്ചിരുന്നു.  

2007–ൽ പുറത്തിറങ്ങിയ ചിത്രമാണ് ബിഗ് ബി.  മമ്മൂട്ടിക്കൊപ്പം മനോജ്.കെ.ജയൻ, ബാല എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരുന്നു. വളരെ വലിയ സാങ്കേതിക മികവോടെ ഒരുക്കിയ ചിത്രത്തിലെ മമ്മൂട്ടിയുടെ സ്റ്റൈലിഷ് ലുക്ക് ആരാധകർക്കിടയിൽ വലിയ ചർച്ചയായിരുന്നു.