‘റിയാന പോൺ സിങ്ങർ, പാടുന്നതിനിടയിൽ ശരീരം പ്രദർശിപ്പിക്കുന്നു’; ആക്ഷേപിച്ച് കങ്കണ, തിരിച്ചടിയായി ബിക്കിനി ചിത്രങ്ങൾ
Mail This Article
കർഷകസമരത്തെ പിന്തുണച്ച പോപ് താരം റിയാനയ്ക്കെതിരെ വീണ്ടും പോർവിളിയുമായി ബോളിവുഡ് താരം കങ്കണ റണൗട്ട്. റിയാന പോൺ സ്റ്റാറും പോൺ സിങ്ങറും ആണെന്നു പറഞ്ഞാണ് കങ്കണയുടെ ആക്ഷേപം. റിയാനയുടെ ബിക്കിനി ചിത്രങ്ങൾ പങ്കുവച്ചുകൊണ്ടാണ് പുതിയ പ്രസ്താവനയുമായി നടി രംഗത്തെത്തിയത്. പണം വാങ്ങിയാണ് റിഹാനയെ പോലുള്ള പോൺ താരങ്ങൾ നമ്മുടെ രാജ്യത്തു നടക്കുന്ന സംഭവ വികാസങ്ങളെക്കുറിച്ച് അഭിപ്രായം പറയുന്നതെന്ന് അവർ തുറന്നടിച്ചു. ഇന്ത്യൻ ഗായകരായ സുനിധി ചൗഹാനെയും നേഹ കക്കറിനെയും വച്ച് റിയാനയെ താരതമ്യപ്പെടുത്തിക്കൊണ്ടാണ് കങ്കണയുടെ ട്വീറ്റ്. ഇന്ത്യ ഒറ്റക്കെട്ടാണെന്നും എല്ലാവരും ചേർന്ന് രാജ്യത്തിന്റെ ശക്തി മറ്റുള്ളവർക്കു മുൽപിൽ തെളിയിക്കണമെന്നും കങ്കണ കുറിച്ചു.
‘നമ്മുടെ രാജ്യത്തെ ഗായകരായ സുനിധി ചൗഹാനെയും നേഹ കക്കറിനെയും പോലയാണ് റിയാന. എന്നാൽ പ്രധാനപ്പെട്ട പ്രത്യേകതയായി എടുത്തു പറയേണ്ട ഒരു കാര്യുണ്ട്. പാടുന്നതിനിടയില്‍ ക്യാമറയ്ക്കു മുൻപിൽ വച്ച് റിയാന രഹസ്യഭാഗങ്ങൾ ഉൾപ്പെടെ പ്രദർശിപ്പിക്കും. ഇത്തരം പോൺ താരങ്ങൾ പണം വാങ്ങിയതിനു ശേഷമാണ് നമ്മുടെ രാജ്യത്തെ പ്രശ്നങ്ങളെക്കുറിച്ച് അഭിപ്രായം പറയാൻ വരുന്നത്. ഇന്ത്യയിലെ 99 ശതമാനം ആളുകളും അമേരിക്കക്കാരുടെ ജീവിത രീതിയെ ശ്രദ്ധിക്കുകയോ അതിനെ വിലമതിക്കുകയോ ചെയ്യുന്നില്ല. ദുർബലരും സ്വാർഥരും പണത്തെക്കുറിച്ചു മാത്രം ചിന്തിക്കുന്നവരും അടങ്ങുന്നതാണ് നിങ്ങളുടെ സമൂഹം. ഇത്ര മാത്രമേ പറയാനുള്ളു. കൂടുതലൊന്നുമില്ല. വിഡ്ഢികളായ നിങ്ങൾ ശാന്തമായി മിണ്ടാതിരുന്നാൽ മതി’.
കങ്കണയുടെ ട്വീറ്റിനു പിന്നാലെ താരത്തിനുള്ള മറുപടിയായി ട്വിറ്റർ ഉപയോക്താക്കൾ രംഗത്തെത്തി. റിയാനയെ പരിഹസിച്ച് ബിക്കിനി ചിത്രങ്ങൾ മാത്രമാണ് കങ്കണ പോസ്റ്റ് ചെയ്തതെങ്കില്‍ അൽപം രൂക്ഷമായിത്തന്നെയാണ് താരത്തിനുള്ള മറുപടി. കങ്കണയുടെ ബിക്കിനി ചിത്രങ്ങള്‍ക്കൊപ്പം പുകവലിയുടെയും തീവ്രപ്രണയത്തിന്റെയും രംഗങ്ങൾ ആണ് ട്വിറ്റർ ഉപയോക്താക്കള്‍ കുത്തിപ്പൊക്കിയത്. കങ്കണയുടെ സിനിമകളിലെ ഇത്തരം ദൃശ്യങ്ങളുടെ സ്ക്രീൻഷോട്ടുകളാണ് സമൂഹമാധ്യമലോകത്ത് വ്യാപകമായി പ്രചരിക്കുന്നത്. നിരവധി പേർ ചിത്രങ്ങൾ ഷെയർ ചെയ്തിട്ടുണ്ട്.
ഒറ്റവരി ട്വീറ്റിലൂടെയാണ് പോപ് താരം റിയാന രാജ്യാന്തര ശ്രദ്ധാകേന്ദ്രമായത്. കേന്ദ്ര സര്‍ക്കാരിന്റെ വിവാദ കാര്‍ഷിക നിയമങ്ങള്‍ പിന്‍വലിക്കണമെന്ന് ആവശ്യപ്പെട്ട് ഡല്‍ഹി അതിര്‍ത്തിയില്‍ നടക്കുന്ന കർഷക സമരത്തെക്കുറിച്ച് ആരും ചർച്ച ചെയ്യാത്തതെന്താണെന്നുള്ള റിയാനയുടെ ട്വീറ്റ് ചുരുങ്ങിയ സമയത്തിനകമാണ് സജീവ ചർച്ചാ വിഷയമായത്. കർഷകസമരത്തെ പിന്തുണച്ച ഗായികയെ കടന്നാക്രമിച്ചായിരുന്നു കങ്കണ റണൗട്ടിന്റെ പ്രതികരണം. അവർ കർഷകരല്ല ഇന്ത്യയെ വിഭജിക്കാന്‍ ശ്രമിക്കുന്ന ഭീകരരാണ് എന്നും പറഞ്ഞ കങ്കണ, വിഡ്ഢീ മിണ്ടാതിരിക്കൂ എന്നു പറഞ്ഞ് റിയാനയെ ആക്ഷേപിച്ചു. ഇരുവരുടെയും പോസ്റ്റുകൾ വൈറലായതോടെ എതിർത്തും അനുകൂലിച്ചും താരങ്ങൾ ഉൾപ്പെടെ നിരവധി പേർ രംഗത്തു വന്നിട്ടുണ്ട്.
