പ്രണയം പറഞ്ഞ് വിജയ് യേശുദാസ്; പിന്നണിയിൽ സിദ്ദ് ശ്രീറാമിന്റെ സ്വരഭംഗിയും; സാൽമൺ 3ഡിയിലെ ഗാനം
Mail This Article
വിജയ് യേശുദാസ് കേന്ദ്രകഥാപാത്രത്തെ അവതരിപ്പിക്കുന്ന ‘സാൽമൺ 3ഡി’യിലെ പ്രണയ ഗാനത്തിന്റെ ലിറിക്കല്‍ വിഡിയോ പുറത്തിറക്കി. മനോഹരമായ സംഗീതത്തിനൊപ്പം മികച്ച ദൃശ്യാനുഭവം കൂടി സമ്മാനിക്കുന്ന, പ്രണയരംഗങ്ങൾ ഇഴചേർത്തൊരുക്കിയ പാട്ടിൽ വിജയ് യേശുദാസും ജോനിതയുമാണ് പ്രത്യക്ഷപ്പെടുന്നത്. ശ്രീജിത്ത് എടവനയുടെ ഈണത്തിൽ സിദ്ദ് ശ്രീറാം ആണ് ആലാപനം. നവീന്‍ കണ്ണന്‍ പാട്ടിനു വരികൾ കുറിച്ചു.
ഡോള്‍സ്, കാട്ടുമാക്കാന്‍ എന്നീ ചിത്രങ്ങള്‍ക്കു ശേഷം ഷലീല്‍ കല്ലൂര്‍ രചനയും സംവിധാനവും നിര്‍വഹിക്കുന്ന ചിത്രമാണ് ‘സാല്‍മണ്‍ 3ഡി’. ഏഴു ഭാഷകളിലായി ഒരുക്കുന്ന ചിത്രത്തിൽ നാൽപത്തിരണ്ട് ഗാനങ്ങളാണുള്ളത്. എംജെഎസ് മീഡിയയുടെ ബാനറില്‍ ഷലീല്‍ കല്ലൂര്‍, ഷാജു തോമസ്, ജോസ് ഡി പെക്കാട്ടില്‍, ജോയ്‌സ് ഡി പെക്കാട്ടില്‍, കീ എന്റര്‍ടെയ്ൻമെന്റ്സ് എന്നിവര്‍ ചേര്‍ന്നാണ് നിർമാണം.
ചിത്രത്തിൽ സര്‍ഫറോഷ് എന്ന കഥാപാത്രത്തെയാണ് വിജയ് യേശുദാസ് അവതരിപ്പിക്കുന്നത്. ചരിത് ബലാപ്പ, ജോനിത ഡോഡ, രാജീവ് പിള്ള, മീനാക്ഷി ജയ്‌സ്വാള്‍, ഷിയാസ് കരീം, പ്രേമി വിശ്വനാഥ്, തന്‍വി കിഷോര്‍, ജാബിര്‍ മുഹമ്മദ്, ആഞ്‌ജോ നായര്‍, ബഷീര്‍ ബഷി തുടങ്ങിയവരാണ് മറ്റു പ്രധാന താരങ്ങൾ. ചിത്രത്തിലെ ആദ്യഗാനമായ ഈ റൊമാന്റിക് ട്രാക് ഇതിനോടകം തന്നെ ശ്രദ്ധേയമായിക്കഴിഞ്ഞു. മികച്ച പ്രതികരണങ്ങളാണു പാട്ടിനു സമൂഹമാധ്യമങ്ങളിൽനിന്നു ലഭിക്കുന്നത്.
