ചങ്ങലകളിൽ തൂങ്ങി, മലക്കം മറിഞ്ഞ് മഞ്ജു; ഡ്യൂപ്പില്ലാതെ താരത്തിന്റെ സാഹസിക പ്രകടനം, സക്സസ് സോങ്ങ് വൈറൽ

‘ചതുർമുഖ’ത്തിൽ‌ സാഹസിക രംഗം ഡ്യൂപ്പ് ഇല്ലാതെ ചെയ്ത മഞ്ജു വാരിയറുടെ വിഡിയോ വൈറലാകുന്നു. ചിത്രത്തിന്റെ സക്സസ് സോങ്ങിലാണ് ഈ രംഗം ഉൾപ്പെടുത്തിയിരിക്കുന്നത്. മനോരമ മ്യൂസിക് ആണ് പാട്ട് പ്രേക്ഷകർക്കരികിൽ എത്തിച്ചത്. രണ്ടു ചങ്ങലകളിൽ തൂങ്ങി മുകളിലേയ്ക്കു പൊങ്ങി മലക്കം മറിയുന്ന രംഗമാണ് മഞ്ജു വാരിയർ അവതരിപ്പിച്ചത്. 

‘ഓവര്‍സ്പീഡില്‍ പായും ലോകമേ

ഓടാതൊന്ന് നില്ല്..

സ്ക്രീനില്‍ നിന്നും കൺകൾ മാറ്റി നീ

ചുറ്റും നോക്ക് നോക്ക്

കാണാതെ നീ പോകും ഉലകിൻ ജാലങ്ങളെ തേട്

സ്റ്റക് ആയി നില്ക്കാതെ നിന്നുള്ളം ‌‌

പാടേ മറക്കും നിന്നെ നീ കാണ്....’

വിധു പ്രതാപും മിഥുൻ അശോകനും ചേർന്നാണ് ഈ സക്സസ് സോങ് ഒരുക്കിയത്. ഗാനം ആലപിച്ചത് വിധു തന്നെ. പാട്ടിലെ റാപ് ഭാഗം റാപ്പർ ഇന്ദുലേഖ വാരിയർ ആലപിച്ചിരിക്കുന്നു. കിരൺ ലാല്‍ ആണ് ഗാനത്തിന്റെ മിക്സിങ് നിർവഹിച്ചത്. വിനായക് ശശികുമാർ പാട്ടിനു വരികൾ കുറിച്ചു.

മഞ്ജു വാര്യർ, സണ്ണി വെയിൻ എന്നിവർ പ്രധാന വേഷങ്ങളിലെത്തിയ ടെക്നോ- ഹൊറർ ചിത്രമാണ് ചതുർമുഖം. ചിത്രത്തിലെ 'മായ കൊണ്ട് കാണാകൂടൊരുക്കി' എന്നു തുടങ്ങുന്ന വിഡിയോ ഗാനം ഏറെ ശ്രദ്ധിക്കപ്പെട്ടിരുന്നു. മനു മഞ്ജിത് എഴുതിയ വരികൾക്ക്, ഈണം പകർന്നു ചിട്ടപ്പെടുത്തിയത് ഡോൺ വിൻസെന്റാണ്. മെലഡി ടച്ചുള്ള ഗാനം ആലപിച്ചത് ശ്വേത മോഹൻ. പാട്ട് നിരവധി ആസ്വാദകരെ സ്വന്തമാക്കിയിരുന്നു. ഇപ്പോൾ പുറത്തു വന്ന സക്സസ് സോങ്ങും പ്രേക്ഷകർ സ്വീകരിച്ചു കഴിഞ്ഞു.