‘ഇതെന്റെ മുത്തച്ഛനു വേണ്ടി’; കവർ ഗാനവുമായി ഒഎൻവിയുടെ കൊച്ചുമകൾ

ഒഎൻവി കുറുപ്പിന്റെ കൊച്ചുമകളും ഗായികയുമായ അപർണ രാജീവ് ഒരുക്കിയ പുതിയ കവർ പതിപ്പ് ആസ്വാദകരെ നേടുന്നു. ഒഎൻവിയുടെ ജന്മവാർഷികത്തോടനുബന്ധിച്ച് അദ്ദേഹം വരികൾ കുറിച്ച ഏതാനും ചില ഗാനങ്ങൾ ചേർത്താണ് ഗായിക കവർ പതിപ്പ് പുറത്തിറക്കിയത്. ഇത് തന്റെ പ്രിയപ്പെട്ട മുത്തച്ഛനു വേണ്ടിയുള്ള സ്നേഹസമ്മാനമാണെന്ന് പാട്ടു പങ്കുവച്ച് അപർണ രാജീവ് കുറിച്ചു. 

ബോംബെ രവിയുടെ സംഗീതത്തിൽ പി.ജയചന്ദ്രൻ ആലപിച്ച ‘ആരെയും ഭാവഗായകനാക്കും’, ദേവരാജൻ മാസ്റ്ററുടെ സംഗീതത്തിൽ കെ.ജെ.യേശുദാസ് ആലപിച്ച ‘അരികിൽ നീ’ എന്നീ പാട്ടുകളാണ് അപർണ രാജീവ് ആലപിച്ചത്. ചുരുങ്ങിയ സമയത്തിനകം ശ്രദ്ധേയമായ വിഡിയോ നിരവധി ആസ്വാദകരെയും സ്വന്തമാക്കിക്കഴിഞ്ഞു. 

മികച്ച ദൃശ്യാനുഭവം കൂടി സമ്മാനിച്ചാണ് അപർണ രാജീവ് കവർ പതിപ്പ് ഒരുക്കിയത്. അനൂപ് മോഹൻ ആണ് ഗാനരംഗങ്ങളുടെ ചിത്രീകരണവും എഡിറ്റിങ്ങും നിർവഹിച്ചത്. ഇതിനു മുൻപും അപർണ രാജീവ് ഒരുക്കിയ കവർ പതിപ്പുകൾ ശ്രദ്ധിക്കപ്പെട്ടിട്ടുണ്ട്.