ഒറ്റ ടേക്കിൽ ‘ആറാടി’ മോഹൻലാൽ; ലൊക്കേഷൻ വിഡിയോ വൈറൽ
Mail This Article
ആറാട്ട് ചിത്രത്തിലെ ‘ഒന്നാം കണ്ടം കേറി’ എന്ന പാട്ടിന്റെ ചിത്രീകരണ വിഡിയോ വൈറൽ ആകുന്നു. ഒറ്റ ടേക്കിൽ ഭംഗിയായി നൃത്തം അവതരിപ്പിക്കുന്ന മോഹൻലാൽ ആണ് ദൃശ്യങ്ങളിൽ. തികഞ്ഞ എനർജിയോടെയാണ് താരം ഡാൻസ് ചെയ്യുന്നത്. പശ്ചാത്തലത്തിൽ മറ്റു നര്‍ത്തകരെയും കാണാം.
വിഡിയോ ഇതിനോടകം മോഹൻലാൽ ആരാധകര്‍ക്കിടയിൽ വ്യാപകമായി പ്രചരിച്ചു കഴിഞ്ഞു. പ്രായത്തെ പിന്നിലാക്കുന്ന ഊർജത്തോടും പ്രസരിപ്പോടും കൂടെയുള്ള താരത്തിന്റെ പ്രകടനമാണ് സമൂഹമാധ്യമങ്ങളിലെ ചർച്ചാവിഷയം. സിനിമയിൽ ഈ ഗാനരംഗം പല ആംഗിളുകളിൽ നിന്നായി ഉൾപ്പെടുത്തിയതിനാൽ വ്യത്യസ്ത ടേക്കുകളിൽ പൂർത്തിയാക്കിയതിന്റെ പ്രതീതിയാണു ലഭിക്കുന്നത്. പാട്ടിലെ അവസാനത്തെ ഒരു മിനിറ്റിലാണ് മോഹൻലാലിന്റെ നൃത്തം ഉൾപ്പെടുത്തിയിരിക്കുന്നത്.
'വില്ലന്‍' എന്ന ചിത്രത്തിനു ശേഷം മോഹന്‍ലാലിനെ നായകനാക്കി ബി.ഉണ്ണികൃഷ്ണന്‍ ഒരുക്കിയ ചിത്രമാണ് ‘ആറാട്ട്’. പുലിമുരുകന്‍', 'മധുരരാജ' എന്നീ ചിത്രങ്ങള്‍ക്കു ശേഷം ഉദയകൃഷ്ണ തിരക്കഥ ഒരുക്കിയ ചിത്രം കൂടിയാണിത്. വിജയരാഘവന്‍, സായികുമാര്‍, സിദ്ദീഖ്, ജോണി ആന്റണി, നന്ദു, കോട്ടയം രമേഷ്, ഇന്ദ്രന്‍സ്, ശ്രദ്ധ ശ്രീനാഥ്, രചന നാരായണന്‍കുട്ടി, സ്വാസ്വിക, മാളവിക മേനോന്‍ തുടങ്ങി വൻ താരനിര തന്നെ ചിത്രത്തിലുണ്ട്.
