ഒരു രൂപ പോലും പ്രതിഫലം വാങ്ങാതെ വാരിസിനായി പാട്ട് പാടിയ സിമ്പു! അറിയാക്കഥ പറഞ്ഞ് വിജയ്

വിജയ് ചിത്രം വാരിസിനു വേണ്ടി നടൻ സിമ്പു ‘തീ ദളപതി’ എന്ന പാട്ട് പാടിയത് പ്രതിഫലം വാങ്ങാതെയാണെന്നു വെളിപ്പെടുത്തൽ. ചിത്രത്തിന്റെ ഓഡിയോ ലോഞ്ച് വേദിയിൽ വച്ച് വിജയ് തന്നെയാണ് ഇക്കാര്യം വ്യക്തമാക്കിയത്. സിമ്പുവിന്റെ പാട്ട് തന്നെ ഏറെ സ്പർശിച്ചെന്നും തനിക്കു വേണ്ടി ഗാനം ആലപിച്ചതിന് സിമ്പുവിനോടു നന്ദി അറിയിക്കുകയാണെന്നും വിജയ് പറ‍ഞ്ഞു.

എസ്.തമന്റെ സംഗീതസംവിധാനത്തിലൊരുങ്ങിയ ഗാനമാണ് ‘തീ ദളപതി’. തമനുമായി വളരെ ആത്മബന്ധമുണ്ട് സിമ്പുവിന്. നടന്റെ ആലാപനമികവ് കൊണ്ടു ശ്രദ്ധിക്കപ്പെട്ട ഗാനം ഇതിനകം യൂട്യൂബിൽ തരംഗമായിക്കഴിഞ്ഞു. മൂന്ന് കോടിയിലേറെ പ്രേക്ഷകരെ നേടിയ ഗാനം ഇപ്പോഴും ട്രെൻഡിങ്ങിൽ തന്നെ. വിവേക് ആണ് പാട്ടിനു വരികൾ കുറിച്ചത്. 

വംശി പൈടിപ്പള്ളി സംവിധാനം ചെയ്യുന്ന ചിത്രമാണ് ‘വാരിസ്’. രശ്മിക മന്ദാന നായികയായെത്തുന്നു. ശ്രീ വെങ്കടേശ്വര ക്രിയേഷന്‍സിന്റെ ബാനറില്‍ ദില്‍ രാജുവാണ് നിർമാണം. വിജയ്‌യ്ക്കൊപ്പം പ്രകാശ് രാജും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്. ഏറെക്കാലത്തെ ഇടവേളയ്ക്ക് ശേഷം ഇരുവരും ഒന്നിക്കുന്ന ചിത്രം കൂടിയാണ് ‘വാരിസ്’.