സ്റ്റൈലിഷ് ലുക്കിൽ ‘കാവാലാ’ ഡാൻസുമായി ഗായത്രി സുരേഷ്; വിഡിയോ വൈറൽ

വൈറലായ ‘കാവാലാ’ പാട്ടിനൊപ്പം തകർപ്പൻ ചുവടുകളുമായി നടി ഗായത്രി സുരേഷ്. സമൂഹമാധ്യമങ്ങളിൽ പങ്കുവച്ച നൃത്ത വിഡിയോ ഇതിനകം വൈറലായിക്കഴിഞ്ഞു. നിരവധി പേരാണു കമന്റുകളുമായി എത്തുന്നത്. സ്റ്റൈലിഷ് ലുക്കിൽ ചടുലമായ ചുവടുകൾ അവതരിപ്പിച്ച ഗായത്രി, ഗാനരംഗത്തിലെ തമന്നയെ പോലും കടത്തിവെട്ടി എന്നാണ് ആരാധകരുടെ പ്രതികരണം. പ്രമുഖർ ഉൾപ്പെടെ നിരവധി പേരെ ചുവടുവപ്പിച്ച ഗാനമാണ് ‘കാവാലാ’. അടുത്തിടെ നടി അഹാന കൃഷ്ണയും പാട്ടിനൊപ്പം നൃത്തം ചെയ്ത് വിഡിയോ പോസ്റ്റ് ചെയ്തിരുന്നു. 

തമന്നയുടെ ഗ്ലാമര്‍ ലുക്കും ചടുലമായ ചുവടുകളും കൊണ്ട് തെന്നിന്ത്യയാകെ തരംഗമായതാണ് ‘കാവാലാ’ ഗാനം. രജനികാന്ത് ചിത്രം ജയിലറിനു വേണ്ടി അനിരുദ്ധ് രവിചന്ദർ ഈണമൊരുക്കിയ ഗാനമാണിത്. അരുൺരാജ കാമരാജ് വരികൾ കുറിച്ച ഗാനം അനിരുദ്ധും ശിൽപ റാവുവും ചേർന്ന് ആലപിച്ചു.

സൺ പിക്ചേഴ്സിന്റെ ബാനറിൽ കലാനിധി മാരൻ നിർമിക്കുന്ന ചിത്രമാണ് ‘ജയിലർ’. മോഹൻലാലും രജനികാന്തും ആദ്യമായി ഒരുമിക്കുന്ന ചിത്രമെന്ന പ്രത്യേകതയും ജയിലറിനുണ്ട്. രജനികാന്തിന്റെ 169ാം ചിത്രം കൂടിയാണ് ജയിലർ. രമ്യ കൃഷ്ണന്‍, വിനായകന്‍, ശിവ്‌രാജ് കുമാർ, ജാക്കി ഷ്റോഫ്, സുനില്‍ തുടങ്ങിയ വമ്പൻ താരനിരയും ചിത്രത്തിൽ അണിനിരക്കുന്നുണ്ട്. ഓഗസ്റ്റ് 10ന് ചിത്രം തിയറ്ററുകളിലെത്തും.