വീണ്ടും പാട്ടുമായി ധ്യാൻ ശ്രീനിവാസന്റെ ചീനട്രോഫി; ‘അയ്യത്താര’ ശ്രദ്ധേയം
Mail This Article
ധ്യാൻ ശ്രീനിവാസൻ നായകനായെത്തിയ ‘ചീനട്രോഫി’യിലെ ‘അയ്യത്താര’ എന്നു തുടങ്ങുന്ന പ്രമോ ഗാനം പ്രേക്ഷകർക്കരികിൽ. ചിത്രത്തിന്റെ സംവിധായകനായ അനിൽ ലാൽ ആണ് പാട്ടിനു വരികൾ കുറിച്ചത്. സൂരജ് സന്തോഷ്, വർക്കി, അനിൽ ലാൽ എന്നിവർ ചേർന്ന് ഈണമൊരുക്കി. റോയ് തോമസ് പാലാ, അനിൽ ലാൽ, വർക്കി എന്നിവർ ചേർന്നു ഗാനം ആലപിച്ചിരിക്കുന്നു. മനോരമ മ്യൂസിക് ആണ് പാട്ട് പുറത്തിറക്കിയത്. ഇതിനകം ശ്രദ്ധേയമായ പാട്ടിനു മികച്ച പ്രതികരണങ്ങളും ലഭിക്കുന്നു. ചിത്രത്തിലെ നേരത്തേ പുറത്തിങ്ങിയ പാട്ടുകളും പ്രേക്ഷകസ്വീകാര്യത നേടിയിരുന്നു.
ധ്യാന്‍ ശ്രീനിവാസനെക്കൂടാതെ ആൻഡ്രോയ്ഡ് കുഞ്ഞപ്പനിലെ നായിക കെന്റി സിര്‍ദോ, ജാഫര്‍ ഇടുക്കി, സുധീഷ്, കെപിഎസി ലീല, ദേവിക രമേഷ്, പൊന്നമ്മ ബാബു, സുനില്‍ ബാബു, ജോണി ആന്റണി, ജോര്‍ഡി പൂഞ്ഞാര്‍, നാരായണന്‍ കുട്ടി, വരദ, ബിട്ടു തോമസ് തുടങ്ങിയവരും അണിനിരക്കുന്ന ചിത്രമാണ് ‘ചീനട്രോഫി’.
പ്രസിഡന്‍ഷ്യല്‍ മൂവീസ് പ്രൈവറ്റ് ലിമിറ്റഡിന്റെ ബാനറില്‍ അനൂപ് മോഹൻ, ആഷ്‌ലിൻ മേരി ജോയ്, ലിജോ ഉലഹന്നാൻ എന്നിവര്‍ ചേര്‍ന്നു ചിത്രം നിര്‍മിക്കുന്നു. പ്രശസ്ത ഷെഫ് സുരേഷ് പിള്ളയും ചിത്രത്തിൽ ഒരു കഥാപാത്രത്തെ അവതരിപ്പിക്കുന്നുവെന്ന പ്രത്യേകതയും ചീനട്രോഫിക്കുണ്ട്. കോമഡി എന്റര്‍ടൈനറായിട്ടാണ് ചിത്രം പ്രേക്ഷകരിലേക്ക് എത്തുന്നത്. സന്തോഷ് അണിമയാണ് ചിത്രത്തിന്റെ ഛായാഗ്രാഹകൻ. എഡിറ്റിങ്: രഞ്ജൻ എബ്രഹാം.
