ലഗേജ് എത്താൻ വൈകി, ബോറടി മാറ്റാൻ എയർപോർട്ടിൽ താളം കൊട്ടി ശിവമണി; വിഡിയോ

കൊച്ചി ഇന്റർനാഷനൽ എയർപോർട്ടിൽ അതിശയിപ്പിക്കും പ്രകടനം കാഴ്ചവച്ച് ഡ്രമ്മർ ശിവമണി. ലഗേജ് കൺവേയർ ബെൽറ്റിനു സമീപത്ത് ഡ്രമ്മർ സ്റ്റിക് ഉപയോഗിച്ച് താളമിട്ടായിരുന്നു തകർപ്പൻ പ്രകടനം. എ.ആർ.റഹ്മാന്റെ ‘ഹമ്മ ഹമ്മ’ എന്ന സൂപ്പർഹിറ്റ് പാട്ടിനാണ് ശിവമണി താളമിട്ടത്. ശീതൾ മേത്തയാണ് ശിവമണിയുടെ വിഡിയോ സമൂഹമാധ്യമങ്ങളിൽ പങ്കുവച്ചത്. 

യാത്രികർ ലഗേജുകൾ എടുക്കാനായി കാത്തുനിൽക്കുന്നതിനിടയിലായിരുന്നു ശിവമണിയുടെ ‘സർപ്രൈസ് താളം’. ഇതിനിടെ എയർപോർട്ടിന്റെ വിവിധയിടങ്ങളിൽ നിന്ന് ആളുകൾ അദ്ദേഹത്തിന്റെ പ്രടകനം കാണാൻ ഓടിയെത്തി. ഏതാനും സെക്കൻഡുകൾ മാത്രം നീണ്ട പ്രകടനത്തിനൊടുവിൽ ശിവമണി കാഴ്ചക്കാരോടു നന്ദി പറഞ്ഞ് അവിടം വിട്ടുപോയി.   

ശിവമണിയുടെ വിഡിയോ ചുരുങ്ങിയ സമയം കൊണ്ട് സമൂഹമാധ്യമങ്ങളിൽ ശ്രദ്ധേയമായിക്കഴിഞ്ഞു. നിരവധി പേരാണു പ്രതികരണങ്ങൾ അറിയിച്ചു രംഗത്തെത്തുന്നത്. ശിവമണി അസാമാന്യ കലാകാരനാണെന്നും ഈ പ്രകടനത്തിലൂടെ ആ പ്രതിഭ മുഴുവൻ വെളിപ്പെടുന്നുവെന്നുമാണ് ലഭിക്കുന്ന പ്രതികരണങ്ങൾ.