‘അളിയാ, ഉണ്ണീ... എവിടായിരുന്നു നീ?’; കിലിയുടെ ‘ആവേശം’ ഹിറ്റ്! കമന്റ് ബോക്സ് തൂക്കി മലയാളികൾ

ലിപ്സിങ്ക് വിഡിയോകളിലൂടെ ലോകശ്രദ്ധ നേടിയ ടാൻസാനിയൻ താരം കിലി പോളിന്റെ പുതിയ വിഡിയോയും ശ്രദ്ധ നേടുന്നു. ഫഹദ് ഫാസിൽ ചിത്രം ആവേശത്തിലെ ഇലുമിനാറ്റി പാട്ടിനൊപ്പം ചുണ്ടുകളനക്കുന്നതിന്റെയും ചുവടുവയ്ക്കുന്നതിന്റെയും വിഡിയോ ആണ് ഇക്കുറി കിലി ഇൻസ്റ്റഗ്രാമിൽ പങ്കുവച്ചത്. പരമ്പരാഗത വേഷം ധരിച്ചു ക്യാമറയ്ക്കു മുന്നിലെത്തിയ കിലി, നിറഞ്ഞ പ്രസരിപ്പോടെയാണ് പാട്ടിനൊപ്പം ചുണ്ടനക്കിയത്. റീലിന്റെ അവസാനഭാഗത്ത് ഇലുമിനാറ്റിയുടെ സിഗ്നേച്ചർ സ്റ്റെപ്പും അവതരിപ്പിച്ചു.

മലയാളം പാട്ടുകളുടെ ലിപ്സിങ്ക് വിഡിയോകൾ പതിവായി പോസ്റ്റു ചെയ്യുന്ന കിലി പോളിനെ, മലയാളികൾ ‘ഉണ്ണിയേട്ടൻ’ എന്ന ഓമനപ്പേരിലാണ് വിളിക്കുന്നത്. ആ പേര് ഇഷ്ടപ്പെട്ടതുകൊണ്ടാവാം ഇപ്പോൾ പോസ്റ്റ് ചെയ്യുന്ന മലയാള വിഡിയോകളിൽ കിലി ‘ഉണ്ണിയേട്ടൻ’ എന്ന് അടിക്കുറിപ്പെഴുതാറുണ്ട്. ഇലുമിനാറ്റി റീൽ വൈറലായതോടെ പ്രിയപ്പെട്ട ‘ഉണ്ണിയേട്ടനെ’ അഭിനന്ദിക്കാനെത്തുന്ന മലയാളികളുടെ നീണ്ട നിരയാണ് കമന്റ് ബോക്സിൽ. 

‘ആവേശം’ പുറത്തിറങ്ങി മാസങ്ങൾ പിന്നിടുമ്പോഴാണ് കിലിയുടെ വിഡിയോ പുറത്തുവരുന്നത്. റീൽ ചെയ്യാൻ ഇത്രയധികം വൈകിയതിന്റെ കാരണങ്ങളും പ്രേക്ഷകർ തിരയുന്നുണ്ട്. ‘ഇത്രയും നാൾ പ്രാക്ടീസ് ചെയ്യുവായിരുന്നോ?’, ‘ഞങ്ങൾക്ക് ഉണ്ണിയേട്ടനായി വന്നവനേ’, ‘ശ്രദ്ധിക്ക് അമ്പാനേ’, ‘അളിയാ ഉണ്ണീ, എന്താ ആവേശം കുറച്ച് വൈകിപ്പോയത്’ എന്നിങ്ങനെ നീളുന്നു കമന്റുകൾ. വിഡിയോ ഇതിനകം വൈറലായിക്കഴിഞ്ഞു. 

ഏതാനും മാസങ്ങൾക്കു മുൻപ് മീശമാധവനിലെ ‘കരിമിഴിക്കുരുവിയെ കണ്ടീലാ’ എന്ന പാട്ടിനൊപ്പം ചുണ്ട് ചലിപ്പിക്കുന്ന വിഡിയോ കിലി പങ്കുവച്ചത് ദശലക്ഷക്കണക്കിന് ആളുകൾ കണ്ടിരുന്നു. ‘കറുത്ത പെണ്ണേ നിന്നെ കാണാഞ്ഞിട്ടൊരുനാളുണ്ടേ’ എന്ന ഹിറ്റ് പാട്ടിനു ലിപ്സിങ്ക് ചെയ്യുന്ന വിഡിയോയും കിലി അടുത്തിടെ പോസ്റ്റ് ചെയ്തിരുന്നു.

ഷേർഷയിലെ ‘തേരി മേരി ഗല്ലാൻ ഹോയി മഷ്ഹൂർ’ എന്ന ഹിറ്റ്‌ ട്രാക്കിന് ചുണ്ടനക്കിയാണ് കിലി പോൾ സമൂഹമാധ്യമലോകത്തിന്റെ ശ്രദ്ധ നേടിയത്. ഇന്ന് 9.9 മില്യൻ ആളുകൾ കിലിയെ ഇൻസ്റ്റഗ്രാമിൽ മാത്രം ഫോളോ ചെയ്യുന്നു. ഇതിൽ താരങ്ങൾ ഉൾപ്പെടെ നിരവധി പ്രമുഖരുണ്ട്. തമിഴ്, തെലുങ്ക്, ഹിന്ദി ഗാനങ്ങൾക്കൊക്കെയനുസരിച്ച് ചുണ്ടുകളനക്കുമെങ്കിലും കിലിക്ക് മലയാള ഗാനങ്ങളോടു പ്രത്യേക ഇഷ്ടമാണ്. മലയാളം പാട്ടുകൾക്കൊപ്പമുള്ള വിഡിയോകളാണ് ഇൻസ്റ്റഗ്രാമിൽ കൂടുതലായും പങ്കുവയ്ക്കാറുള്ളത്.