ദീപാവലി ആഘോഷത്തിൽ തിളങ്ങി നിക് ജൊനാസ്; ഹോട്ട് ലുക്കിൽ പ്രിയങ്ക ചോപ്ര

പങ്കാളി പ്രിയങ്ക ചോപ്രയ്ക്കൊപ്പം ലണ്ടനിൽ ദീപാവലി ആഘോഷിച്ച് ഗായകൻ നിക് ജൊനാസ്. ഇരുവരും സുഹൃത്തുക്കൾക്കു വേണ്ടിയൊരുക്കിയ ആഘോഷവേളയിലെ ചിത്രങ്ങളാണ് ഇപ്പോൾ പുറത്തുവന്നിരിക്കുന്നത്. ലണ്ടനിലെ ഒരു റസ്റ്ററന്റിൽ വച്ചായിരുന്നു ദീപാവലി ആഘോഷം. പരിപാടിക്കു ശേഷം നിക് ജൊനാസും പ്രിയങ്കയും മടങ്ങുന്നതിന്റെ ദൃശ്യങ്ങളും സമൂഹമാധ്യമങ്ങളിൽ പ്രചരിക്കുകയാണ്. മകൾ മാൾട്ടി എവിടെയെന്ന് ആരാധകർ അന്വേഷിക്കുന്നുണ്ട്. 

ക്രീം കളർ കുര്‍ത്ത പൈജാമ സെറ്റ് ധരിച്ച് ഇന്ത്യൻ ലുക്കിലാണ് നിക് ജൊനാസ് ദീപാവലി ആഘോഷത്തിൽ പങ്കെടുത്തത്. നെറ്റ് ഫാബ്രിക് കൊണ്ടുള്ള ചുവന്ന സാരിയിൽ പ്രിയങ്ക തിളങ്ങി. പ്ലഞ്ചിങ് നെക്‌ലൈൻ ബ്ലൗസ് ധരിച്ച് ഹോട്ട് ലുക്കിലാണ് നടി എത്തിയത്. സാരിക്ക് അനുയോജ്യമായ വിധത്തിൽ ചുവന്ന വളകളും അണിഞ്ഞു. പരമ്പരാഗത ആഘോഷങ്ങളിലെല്ലാം പ്രിയങ്കയ്ക്കൊപ്പം നിക്കും പ്രത്യക്ഷപ്പെടുന്നത് പതിവാണ്. ആഘോഷ ചിത്രങ്ങളെല്ലാം നിക് തന്നെ ആരാധകരുമായി പങ്കുവയ്ക്കാറുമുണ്ട്. 

പ്രിയങ്ക ചോപ്രയുമായുള്ള വിവാഹം കഴിഞ്ഞതോടെ ഇന്ത്യൻ സംസ്കാരത്തിലുള്ള ആഘോഷങ്ങളിലെല്ലാം നിക് ജൊനാസ് പങ്കെടുക്കാറുണ്ട്. ഇടയ്ക്കിടെ ഗായകൻ ഇന്ത്യൻ സന്ദർശനം നടത്താറുണ്ട്. ഹോളി ആഘോഷത്തിന്റെയും കുടുംബാംഘോഷത്തിന്റെയുമൊക്കെ ചിത്രങ്ങൾ നിക് ആരാധകരുമായി പങ്കുവച്ചിട്ടുണ്ട്. അടുത്തിടെ ഉത്തരേന്ത്യൻ ആചാരമായ കർവ ചൗഥ് നടത്തിയതിന്റെ ചിത്രങ്ങൾ പ്രിയങ്ക ചോപ്ര പോസ്റ്റ് ചെയ്തിരുന്നു. 

2018 ഡിസംബർ ഒന്നിനാണ് നിക് ജൊനാസും പ്രിയങ്ക ചോപ്രയും വിവാഹിതരായത്. 2022 ജനുവരി 22ന് ഇരുവർക്കും പെൺകു‍ഞ്ഞ് പിറന്നു. വാടകഗർഭപാത്രത്തിലൂടെയാണ് ഇരുവരും മാതാപിതാക്കളായത്. നിക്കിനെ വിദേശിയായി കാണുന്നില്ലെന്നും കുടുംബത്തിലെ അംഗത്തെപ്പോലെയാണെന്നും അടുത്തിടെ ഒരു അഭിമുഖത്തിൽ പ്രിയങ്കയുടെ അമ്മ മധു ചോപ്ര പറഞ്ഞത് ഏറെ ശ്രദ്ധേയമായിരുന്നു.