സമാന്തയല്ല, തീപിടിപ്പിക്കാൻ ശ്രീലീല; മില്യനടിച്ച് പുഷ്പയിലെ ഹോട്ട് നമ്പറിന്റെ പ്രമോ

‘പുഷ്പ 2’ല്‍ തെലുങ്കിലെ ഡാൻസിങ് ക്വീൻ ശ്രീലീല അവതരിപ്പിക്കുന്ന ഐറ്റം നമ്പറിന്റെ പ്രമോ വിഡിയോ പുറത്ത്. ദേവി ശ്രീ പ്രസാദ് ആണ് ‘കിസിക്’ എന്നു പേരിട്ടിരിക്കുന്ന പാട്ടിന് ഈണമൊരുക്കിയിരിക്കുന്നത്. 17 സെക്കൻഡ് മാത്രം ദൈർഘ്യമുള്ള പ്രമോ വിഡിയോ ഇതിനകം 1 മില്യനിലേറെ പ്രേക്ഷകരെ നേടിക്കഴിഞ്ഞു. ഇതോടെ പാട്ടിന്റെ പൂർണപതിപ്പിനു വേണ്ടി കാത്തിരിക്കുകയാണ് പ്രേക്ഷകർ. 

ലോതിക, സുഭലഷിണി എന്നിവര്‍ ചേര്‍ന്നാണ് ‘കിസിക്’ ആലപിച്ചിരിക്കുന്നത്. പാട്ട് വൈകാതെ പ്രേക്ഷകർക്കു മുന്നിലെത്തും. ശ്രീലീലയുടെ പ്രകടനം ‘മിന്നിക്കും’ എന്നാണ് പ്രമോ കണ്ട് ആരാധകർ കുറിക്കുന്നത്. ഗാനരംഗത്തിൽ ചിത്രത്തിലെ നായകൻ അല്ലു അർജുനും എത്തുമെന്നാണ് പ്രേക്ഷകരുടെ അനുമാനം. ഗാനത്തിന്‍റെ ചിത്രീകരണത്തിനിടെ പുറത്തുവന്ന ചിത്രങ്ങളൊക്കെ സോഷ്യല്‍ മീഡിയയില്‍ തരംഗമായിരുന്നു.

‘പുഷ്പ’യിലെ ഹോട്ട് നമ്പറിനായി ശ്രീലീല 3 കോടിയാണ് പ്രതിഫലമായി വാങ്ങുന്നത്. ‘ഗുണ്ടൂര്‍ കാരം’ എന്ന ചിത്രത്തിലെ കുര്‍ച്ചി മടത്തപ്പെട്ടി എന്ന ഗാനത്തിലൂടെ പ്രേക്ഷശ്രദ്ധ നേടിയ നടിയാണ് ശ്രീലീല.

പുഷ്പ’ ഒന്നാം ഭാഗത്തിലെ പ്രധാന ആകർഷണങ്ങളിലൊന്നാണ് സമാന്തയുടെ ‘ഊ അന്തവാ...’ എന്ന ഹോട്ട് നമ്പർ. നടിയുടെ കരിയറിലെ ആദ്യ ഐറ്റം ഡാൻസ് ആയിരുന്നു അത്. ഒറ്റപ്പാട്ടിനായി സമാന്ത 5 കോടി രൂപ പ്രതിഫലമായി കൈപ്പറ്റിയെന്നാണു വിവരം. സിനിമ റിലീസ് ചെയ്യാന്‍ ദിവസങ്ങള്‍ മാത്രം ബാക്കി നില്‍ക്കവെയാണ് നടി ഗാനത്തിൽ അഭിനയിച്ചത്. ദേവി ശ്രീ പ്രസാദ് ഈണമൊരുക്കിയ ‘ഊ അന്തവാ...’ തെലുങ്കിൽ ഇന്ദ്രവതി ചൗഹാൻ ആണ് ആലപിച്ചത്.