നാനും റൗഡി താനിലെ പാട്ട് പാടി നയൻതാരയുടെ ഇരട്ടകൺമണികൾ; വിഡിയോ പങ്കിട്ട് വിഘ്നേശ് ശിവൻ

നയന്‍താര-വിഘ്‌നേശ് ശിവന്‍ ചിത്രം ‘നാനും റൗഡി താന്‍’ സിനിമയിലെ ഗാനം ആലപിച്ച് ദമ്പതികളുടെ ഇരട്ടക്കുട്ടികളായ ഉയിരും ഉലഗും. ചിത്രത്തിലെ ‘തങ്കമേ’ എന്ന ഗാനം ഇരുവരും ആലപിക്കുന്നതിന്റെ ക്യൂട്ട് വിഡിയോ വിഘ്‌നേശ് ശിവന്‍ സമൂഹമാധ്യമങ്ങളിൽ പങ്കുവച്ചു. മുറിയിലെ ടിവിയില്‍ ഈ ഗാനം പ്ലേ ചെയ്തതോടെ അതിനനുസരിച്ച് കുട്ടികളും പാടാൻ ശ്രമിക്കുന്നതാണ് ദൃശ്യങ്ങളിൽ കാണാനാകുക.

‘അഡഡഡഡഡഡ... എന്റെ ഉയിരും ഉലഗും’ എന്ന അടിക്കുറിപ്പോടെയാണ് വിഘ്‌നേശ് ശിവന്റെ സമൂഹമാധ്യമ പോസ്റ്റ്. നയൻതാരയെ ടാഗ് ചെയ്തിട്ടുമുണ്ട്. ചുരുങ്ങിയ സമയത്തിനകം വിഡിയോ വൈറലായിക്കഴിഞ്ഞു. നിരവധി പേരാണു പ്രതികരണങ്ങളുമായി എത്തുന്നത്. 

2022 സെപ്റ്റംബർ 26നാണു നയൻതാര–വിഘ്‌നേശ് ദമ്പതികൾക്ക് വാടക ഗർഭധാരണത്തിലൂടെ ഇരട്ടക്കുട്ടികൾ പിറന്നത്. ഇരുവരും സമൂഹമാധ്യമലോകത്തിന് ഏറെ സുപരിചിതരാണ്. നയൻസും വിഘ്നേശും ഇടയ്ക്കിടെ മക്കളുടെ ചിത്രങ്ങൾ ആരാധകരുമായി പങ്കുവയ്ക്കാറുണ്ട്.