ആന്ധ്രയിൽ വോട്ടറെ തല്ലി എംഎൽഎ, തിരിച്ചുംകിട്ടി

തെനാലി (ആന്ധ്ര)∙ വോട്ടെടുപ്പിനിടെ ആന്ധ്രയിൽ ഭരണകക്ഷി എംഎൽഎ വോട്ടറെ തല്ലി; തൽക്ഷണം തന്നെ തിരിച്ചുംകിട്ടി. ഗുണ്ടൂർ ജില്ലയിലെ തെനാലിയിലെ ഇതാനഗറിലാണ് സംഭവം. എംഎൽഎയും കുടുംബാംഗങ്ങളും ബൂത്തിൽ വരി തെറ്റിച്ച് കയറാൻ ശ്രമിച്ചതിനെയാണ് വോട്ടറായ സുധാകർ ചോദ്യം ചെയ്തത്.

കുപിതനായ വൈഎസ്ആർ കോൺഗ്രസ് എംഎൽഎ എ. ശിവകുമാർ സുധാകറിന്റെ മുഖത്തടിച്ചു. ഒട്ടും ആലോചിച്ചുനിൽക്കാതെ സുധാകറും എംഎൽഎയ്ക്കു തിരിച്ചുകൊടുത്തു. ഇതോടെ എംഎൽഎയുടെ അനുയായികൾ സുധാകറെ ക്രൂരമായി മർദിച്ചു. പൊലീസും നാട്ടുകാരും എത്തിയാണ് സുധാകറെ രക്ഷിച്ചത്. കേസെടുക്കാൻ തിരഞ്ഞെടുപ്പു കമ്മിഷൻ നിർദേശിച്ചു.