അർധസേനകളിൽ അഗ്നിവീറിന് 10% സംവരണം; പരിശീലന കാലയളവിലും പ്രായനിബന്ധനകളിലും ഇളവ്

ന്യൂഡൽഹി ∙ ഹ്രസ്വകാല സേവനത്തിനു ശേഷം സൈന്യത്തിൽനിന്നു വിരമിക്കുന്ന അഗ്നിവീറുകൾക്ക് അർധസേനകളായ സിആർപിഎഫ്, ബിഎസ്എഫ്, സിഐഎസ്എഫ്, ആർപിഎഫ്, സശസ്ത്ര സീമാബൽ എന്നിവയിൽ 10% സംവരണം അനുവദിക്കും. കോൺസ്റ്റബിൾ തസ്തികയിലടക്കം സംവരണമുണ്ടാകുമെന്നു സേനാ മേധാവികൾ വ്യക്തമാക്കി. പരിശീലന കാലയളവിലും സേനയിൽ ചേരുന്നതിനുള്ള പ്രായനിബന്ധനകളിലും ഇവർക്ക് ഇളവ് ലഭിക്കും. ആദ്യ ബാച്ചിന് അഞ്ചും തുടർന്നുള്ളവയ്ക്ക് മൂന്നും വർഷം ഇളവും ലഭിക്കും. 

കര, നാവിക, വ്യോമ സേനകളിൽ 4 വർഷത്തേക്കാണ് അഗ്നിപഥ് പദ്ധതി. സേവനകാലയളവിനു ശേഷം അഗ്നിവീർ സേനാംഗങ്ങളിൽ 25% സേനയിൽ തുടരും; ബാക്കിയുള്ളവരെ ഒഴിവാക്കും. ഇത് വ്യാപക തൊഴിലില്ലായ്മയ്ക്കു വഴിയൊരുക്കുമെന്ന ആരോപണവുമായി പ്രതിപക്ഷ കക്ഷികൾ രംഗത്തിറങ്ങിയ വേളയിലാണ് പരിഹാരമെന്ന നിലയിൽ അർധസേനകളിൽ സംവരണം അനുവദിച്ചത്.