കേന്ദ്ര ബജറ്റ് ഇന്ന് 11.00ന്; തുടർച്ചയായി ഏറ്റവും കൂടുതൽ ബജറ്റ് അവതരിപ്പിച്ച നേട്ടത്തിൽ നിർമല സീതാരാമനും

ന്യൂഡൽഹി ∙ ഇന്നത്തെ സമ്പൂർണ ബജറ്റോടെ സ്വതന്ത്ര ഇന്ത്യയിൽ തുടർച്ചയായി ഏറ്റവും കൂടുതൽ ബജറ്റുകൾ (ഏഴെണ്ണം) അവതരിപ്പിച്ച നേട്ടത്തിൽ സി.ഡി.ദേശ്മുഖിനൊപ്പം ധനമന്ത്രി നിർമല സീതാരാമനും. 1951– 56 ൽ ഒരു ഇടക്കാല ബജറ്റ് ഉൾപ്പെടെ 7 ബജറ്റുകളാണു ദേശ്മുഖ് അവതരിപ്പിച്ചത്. തിരഞ്ഞെടുപ്പിലൂടെ പാർലമെന്റ് നിലവിൽ വന്ന 1952 ഏപ്രിലിനു ശേഷം തുടർച്ചയായി ഏറ്റവും കൂടുതൽ ബജറ്റ് അവതരിപ്പിച്ചതിന്റെ റെക്കോർഡ് മൊറാർജി ദേശായിക്കാണ് (6 എണ്ണം). 

2 മണിക്കൂർ 40 മിനിറ്റ് ബജറ്റ്

∙ ബജറ്റ് അവതരിപ്പിച്ച ആദ്യ വനിത ഇന്ദിര ഗാന്ധിയാണെങ്കിലും പൂർണസമയ ധനമന്ത്രിയുടെ റോളിലെത്തുന്ന ആദ്യ വനിതയാണ് നിർമല. 1969 ൽ കോൺഗ്രസ് പിളർപ്പിനെത്തുടർന്ന് മൊറാർജി ദേശായി പുറത്തായപ്പോഴാണ്, 1970 ലെ ബജറ്റ് പ്രധാനമന്ത്രിയായിരുന്ന ഇന്ദിരാ ഗാന്ധി അവതരിപ്പിച്ചത്. 

∙ ഏറ്റവും ദൈർഘ്യമേറിയ ബജറ്റ് അവതരിപ്പിച്ച റെക്കോർഡും നിർമലയ്ക്കാണ്. 2020–21 ലെ ബജറ്റ് അവതരണം 2 മണിക്കൂർ 40 മിനിറ്റ് നീണ്ടു. 

മൂന്നാം മോദി സർക്കാരിന്റെ ആദ്യ ബജറ്റ്. അവതരണം രാവിലെ 11ന്. ബജറ്റ് രേഖകളും പ്രസംഗവും indiabudget.gov.in എന്ന വെബ്സൈറ്റിൽ ലഭ്യമാകും.