ഡോക്ടറുടെ കൊലപാതകം: മമത പരാജയപ്പെട്ടു, രാജിവയ്ക്കണം: ‘നിർഭയ’യുടെ മാതാവ്
Mail This Article
ബലിയ (യുപി)∙ കൊൽക്കത്തയിൽ പിജി ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ കർശന നടപടികൾ സ്വീകരിക്കുന്ന കാര്യത്തിൽ പരാജയപ്പെട്ട ബംഗാൾ മുഖ്യമന്ത്രി മമത ബാനർജി രാജിവയ്ക്കണമെന്ന് 2012ൽ ഡൽഹിയിൽ സമാനസാഹചര്യത്തിൽ കൊല്ലപ്പെട്ട ‘നിർഭയ’യുടെ മാതാവ് ആശാദേവി ആവശ്യപ്പെട്ടു. കുറ്റവാളികൾക്കെതിരെ അധികാരം പ്രയോഗിക്കുന്നതിനു പകരം മമത വിഷയം തിരിച്ചുവിടുകയാണെന്ന് ആശാദേവി ആരോപിച്ചു.
ആളുകളുടെ ശ്രദ്ധ തിരിക്കാനാണു മമത പ്രതിഷേധവുമായി ഇറങ്ങിയത്. അവരും സ്ത്രീയാണല്ലോ. തന്റെ അധികാരം ഉപയോഗിച്ച് കുറ്റവാളികൾക്കെതിരെ കർശന നടപടിയാണ് അവർ സ്വീകരിക്കേണ്ടിയിരുന്നത്. അതിനു സാധിക്കാത്തതിനാൽ രാജിവയ്ക്കുകയാണു വേണ്ടത്– ആശാദേവി ഉത്തർ പ്രദേശിലെ ബലിയയിൽ പറഞ്ഞു.
പ്രതികൾക്കു വധശിക്ഷ നൽകണമെന്ന് ആവശ്യപ്പെട്ട് മമത ബാനർജിയുടെ നേതൃത്വത്തിൽ പ്രതിഷേധ റാലി നടന്നിരുന്നു. ബലാത്സംഗ കേസുകളിലെ പ്രതികൾക്ക് കോടതികളിൽ നിന്ന് അതിവേഗം ശിക്ഷ വാങ്ങിക്കൊടുക്കുന്ന കാര്യം കേന്ദ്ര, സംസ്ഥാന സർക്കാരുകൾ ഗൗരവമായെടുത്തില്ലെങ്കിൽ സമാന സംഭവങ്ങൾ രാജ്യത്തിന്റെ പല ഭാഗത്തും ആവർത്തിക്കുമെന്നും ആശാദേവി മുന്നറിയിപ്പു നൽകി.
