ഉപഗ്രഹങ്ങൾ വിക്ഷേപിച്ച് ഉടനടി മടങ്ങിയെത്തി റൂമി

ചെന്നൈ ∙ സ്പേസ് സ്റ്റാർട്ടപ് കമ്പനിയായ സ്‌പേസ് സോൺ ഇന്ത്യ വികസിപ്പിച്ച രാജ്യത്തെ ആദ്യ പുനരുപയോഗ ഹൈബ്രിഡ് റോക്കറ്റ് ‘റൂമി 1’ വിജയകരമായി വിക്ഷേപിച്ചു. ചെന്നൈയ്ക്കു സമീപമുള്ള മൊബൈൽ ലോഞ്ച് പാഡിൽ നിന്ന് രാവിലെ 7.02നു വിക്ഷേപിച്ച റോക്കറ്റ് 3 ഉപഗ്രഹങ്ങളെ 80 കിലോമീറ്റർ അകലത്തിലുള്ള നിശ്ചിത ഭ്രമണപഥത്തിലെത്തിച്ചു. തുടർന്ന്, 7 മിനിറ്റിൽ റോക്കറ്റ് മടങ്ങിയെത്തിയതായി അധികൃതർ അറിയിച്ചു.

കോസ്മിക് റേഡിയേഷൻ തീവ്രത ഉൾപ്പെടെയുള്ള അന്തരീക്ഷ അവസ്ഥകളെ നിരീക്ഷിക്കുന്നതിനായുള്ള 3 ക്യൂബ് ഉപഗ്രഹങ്ങളാണു ഭ്രമണപഥത്തിലെത്തിച്ചത്. ആറായിരത്തോളം സ്കൂൾ വിദ്യാർഥികൾ ഉപഗ്രഹ നിർമാണത്തിൽ പങ്കാളികളായി. ഖര, ദ്രവ ഇന്ധനങ്ങൾ ഉപയോഗിക്കാവുന്ന റോക്കറ്റ് പരിസ്ഥിതി സൗഹൃദമാണെന്ന് അധികൃതർ അവകാശപ്പെട്ടു.