ആദായനികുതി കുടിശിക: ഒത്തുതീർപ്പു പദ്ധതി അടുത്തമാസം

ന്യൂഡൽഹി ∙ ‘വിവാദ് സെ വിശ്വാസ്’ എന്ന ആദായനികുതി കുടിശിക ഒത്തുതീർപ്പു പദ്ധതിയുടെ രണ്ടാം പതിപ്പ് ഒക്ടോബർ ഒന്നിന് ആരംഭിക്കുമെന്ന് സർക്കാർ വിജ്ഞാപനം. ഇത്തവണത്തെ ബജറ്റിലാണ് പദ്ധതി പ്രഖ്യാപിച്ചത്. ഏകദേശം 35 ലക്ഷം കോടി രൂപയുടെ ടാക്സ് ഡിമാൻഡുകൾ തർക്കത്തിൽപ്പെട്ടു കിടക്കുന്നുണ്ടെന്നാണ് കണക്ക്.

പദ്ധതിയുടെ വിശദമായ മാർഗരേഖ വരും ദിവസങ്ങളിൽ വന്നേക്കും. 2020ലാണ് ഒന്നാം പതിപ്പ് നടപ്പാക്കിയത്. ഏകദേശം ഒരു ലക്ഷം പേർ ഈ സൗകര്യം പ്രയോജനപ്പെടുത്തിയിരുന്നു. 75,000 കോടി രൂപയാണ് നികുതിയിനത്തിൽ സർക്കാരിന് ഇതുവഴി ലഭിച്ചത്.