മണിപ്പുരിൽ യുവാക്കളെ ബന്ദിയാക്കി

കൊൽക്കത്ത∙ മണിപ്പുരിൽ 3 മെയ്തെയ് യുവാക്കളെ കുക്കികൾ ബന്ദികളാക്കി. ജീവൻ രക്ഷിക്കണമെന്നാവശ്യപ്പെട്ട് ഇവർ മുഖ്യമന്ത്രി ബിരേൻ സിങ്ങിനോട് അഭ്യർഥിക്കുന്ന വിഡിയോ വൈറലായതോടെ ഇംഫാൽ താഴ്‌വരയിൽ വീണ്ടും സംഘർഷാവസ്ഥ ഉടലെടുത്തു. ബന്ദികളിൽ ഒരാളെ പിന്നീടു കുക്കികൾ മോചിപ്പിച്ചു.

ഇംഫാൽ ഈസ്റ്റ് അതിർത്തിയിൽ നിന്നാണു യുവാക്കളെ ഗ്രാമസംരക്ഷണസേന കൊണ്ടുപോയത്. കേന്ദ്രസർവീസിലേക്കുള്ള പരീക്ഷ എഴുതാനെത്തിയ ഇവർ കുക്കി മേഖലയിൽ എത്തിപ്പെടുകയായിരുന്നു. മണിപ്പുരിൽ കലാപം തുടങ്ങിയശേഷം കുക്കികളും മെയ്തെയ്കളും അതിർത്തികൾ മുറിച്ചുകടക്കാറില്ല. അറിയാതെ അതിർത്തികൾ കടക്കുന്നവരെ കൊലപ്പെടുത്തുന്ന സംഭവവും ഉണ്ടായിട്ടുണ്ട്.