ഹരിയാന, ജമ്മു കശ്മീർ: റാലിയിൽ രാഹുൽ മുന്നേറ്റം, മോദി പിന്നിൽ

ന്യൂഡൽഹി ∙ തിരഞ്ഞെടുപ്പു പ്രചാരണരംഗത്ത് അത്യധ്വാനം ശീലമാക്കിയ പ്രധാനമന്ത്രി നരേന്ദ്ര മോദിയെ മറികടന്നിരിക്കുകയാണ് പ്രതിപക്ഷനേതാവ് രാഹുൽ ഗാന്ധി. നാളെ വോട്ടെടുപ്പു നടക്കുന്ന ഹരിയാനയിലും വോട്ടെടുപ്പു പൂർത്തിയായ ജമ്മു കശ്മീരിലും പ്രചാരണരംഗത്ത് കൂടുതൽ സജീവമായത് രാഹുലാണ്. ഹരിയാനയിൽ മാത്രം 8 റാലികളിൽ രാഹുൽ പ്രസംഗിച്ചു.

2 ദിവസമെടുത്ത് ഇരുപതോളം മണ്ഡലങ്ങളിലൂടെ വിജയ് സങ്കൽപ് യാത്രയും നടത്തി. ജമ്മു കശ്മീരിലും‌ രാഹുലാണു നിറ‍ഞ്ഞുനിന്നത്. അവിടെ 6 റാലികളിൽ പങ്കെടുത്തു. അതിനിടെ, ജമ്മു മേഖലയിൽ പോകാതെ രാഹുൽ കശ്മീരിൽ ശ്രദ്ധയൂന്നിയെന്ന വിമർശനം സഖ്യകക്ഷിയായ നാഷനൽ കോൺഫറൻസ് ഉയർത്തി. ജമ്മുവിൽ നിശ്ചയിച്ചിരുന്ന 2 പരിപാടികൾ റദ്ദാക്കേണ്ടിയും വന്നു.

ഹരിയാനയിലും ജമ്മു കശ്മീരിലും 4 വീതം റാലികളിലാണു മോദി പങ്കെടുത്തത്. ഹരിയാനയിലെ ബിജെപി പ്രവർത്തകരുടെ യോഗത്തിൽ ഓൺലൈനായും പങ്കെടുത്തു. 2014 ൽ ലോക്സഭാ തിരഞ്ഞെടുപ്പുജയത്തിന്റെ തിളക്കവുമായി ഹരിയാനയിൽ 10 റാലികൾ നയിച്ച മോദി 47 സീറ്റുമായി സംസ്ഥാനത്ത് അധികാരത്തിലെത്താൻ ബിജെപിയെ സഹായിച്ചു.

2019 ൽ ലോക്സഭയിലെ വമ്പൻ ജയത്തിലൂടെ ആത്മവിശ്വാസം ഉയർത്തിയ മോദി പിന്നാലെ നടന്ന ഹരിയാന തിരഞ്ഞെടുപ്പിൽ റാലികൾ ആറായി കുറച്ചു. ജെജെപിയുമായി ചേർന്നു സർക്കാരുണ്ടാക്കിയെങ്കിലും കേവലഭൂരിപക്ഷം നേടാൻ കഴിയാതിരുന്നതു ബിജെപിക്കു തിരിച്ചടിയായിയിരുന്നു.