സമരത്തിന് പിന്തുണ; ബംഗാളിൽ 50 ഡോക്ടർമാർ രാജിവച്ചു

കൊൽക്കത്ത ∙ ആർ.ജി.കർ മെഡിക്കൽ കോളജിൽ പിജി ഡോക്ടർ പീഡനത്തിനിരയായി കൊല്ലപ്പെട്ട സംഭവത്തിൽ, സമരം ചെയ്യുന്ന ജൂനിയർ ഡോക്ടർമാർക്ക് പിന്തുണ പ്രഖ്യാപിച്ച് ആശുപത്രിയിലെ 50 സീനിയർ ഡോക്ടർമാർ രാജിക്കത്ത് നൽകി. ഡോക്ടർമാർക്ക് സുരക്ഷ ഉറപ്പുനൽകണമെന്നും സർക്കാർ നേരത്തേ നൽകിയ വാഗ്ദാനങ്ങൾ പാലിക്കണമെന്നും ആവശ്യപ്പെട്ട് കഴിഞ്ഞ 5 ദിവസമായി ജൂനിയർ ഡോക്ടർമാർ നിരാഹാര സമരത്തിലാണ്.

പിജി ഡോക്ടർ കൊല്ലപ്പെട്ടതിനെത്തുടർന്ന് സമരം തുടങ്ങിയ ജൂനിയർ ഡോക്ടർമാർ സർക്കാർ നൽകിയ ഉറപ്പു വിശ്വസിച്ചു പിൻവാങ്ങിയിരുന്നു. എന്നാൽ, ഡോക്ടർക്കെതിരേ രോഗിയുടെ ബന്ധുക്കൾ ആക്രമണം നടത്തിയതോടെയാണ് നിരാഹാരസമരം ആരംഭിച്ചത്. സർക്കാർ നൽകിയ ഉറപ്പുകൾ അടുത്ത മാസത്തോടെ 90 ശതമാനവും പാലിക്കപ്പെടുമെന്ന് ചീഫ് സെക്രട്ടറി പറഞ്ഞു.