അൻമോൽ ബിഷ്ണോയി:വിവരം നൽകിയാൽ 10 ലക്ഷം രൂപ

ന്യൂഡൽഹി ∙ കുപ്രസിദ്ധ ഗുണ്ടാത്തലവൻ ലോറൻസ് ബിഷ്ണോയിയുടെ സഹോദരനും ഒട്ടേറെ ക്രിമിനൽ കേസുകളിൽ പ്രതിയുമായ ഭാനു എന്ന അൻമോൽ ബിഷ്ണോയിയെപ്പറ്റി വിവരം നൽകുന്നവർക്കു ദേശീയ അന്വേഷണ ഏജൻസി (എൻഐഎ) 10 ലക്ഷം രൂപ പാരിതോഷികം പ്രഖ്യാപിച്ചു.

ഇയാൾ കാനഡയിലുണ്ടെന്നാണു കരുതുന്നത്. എൻസിപി നേതാവും മഹാരാഷ്ട്ര മുൻ മന്ത്രിയുമായ ബാബ സിദ്ദിഖിയെ മുംബൈയിൽ ഈ മാസം 12ന് കൊലപ്പെടുത്തിയ കേസിലും ബോളിവുഡ് നടൻ സൽമാൻ ഖാന്റെ വീടിനു സമീപം ഈ വർഷമാദ്യം നടന്ന വെടിവയ്പു കേസിലും അൻമോൽ ബിഷ്ണോയിയെ മുംബൈ ക്രൈംബ്രാഞ്ച് തിരയുന്നുണ്ട്.