ഭാരത് ജോഡോ സംവിധാൻ അഭിയാൻ യാത്ര 26ന് തുടങ്ങും

ന്യൂഡൽഹി ∙ ഹരിയാന തിരഞ്ഞെടുപ്പു തോൽവിക്കു പിന്നാലെ പാർട്ടി വിടുകയും പിന്നീടു തിരിച്ചെത്തുകയും ചെയ്ത കോൺഗ്രസ് ഒബിസി വിഭാഗം അധ്യക്ഷൻ അജയ് സിങ് യാദവിന്റെ നേതൃത്വത്തിൽ ഭാരത് ജോഡോ സംവിധാൻ അഭിയാൻ യാത്ര പ്രഖ്യാപിച്ചു. ബിജെപി ജാതി സെൻസസ് നടത്തുന്നില്ലെന്ന് ആരോപിച്ചുള്ള യാത്രയ്ക്ക് 26ന് ഡൽഹി തൽക്കത്തോറ സ്റ്റേഡിയത്തിൽ തുടക്കമാകുമെന്ന് അജയ് സിങ് അറിയിച്ചു. 

പാർട്ടി അധ്യക്ഷൻ മല്ലികാർജുൻ ഖർഗെ, കോൺഗ്രസ് നേതാവ് രാഹുൽ ഗാന്ധി ഉൾപ്പെടെയുള്ളവർ പങ്കെടുക്കുമെന്നും അദ്ദേഹം വ്യക്തമാക്കി. കോൺഗ്രസിന്റെ ഒബിസി–ന്യൂനപക്ഷ വിഭാഗത്തിനൊപ്പം എസ്‌സി, എസ്ടി വിഭാഗങ്ങൾ കൂടി ചേർന്നാണ് പരിപാടി സംഘടിപ്പിക്കുന്നത്.