‘കാൻസർ സ്പോട്ട്’: അർബുദം കണ്ടെത്താൻ രക്തപരിശോധന

ന്യൂഡൽഹി∙ കാൻസർ തുടക്കത്തിൽതന്നെ കണ്ടെത്താൻ രക്ത പരിശോധനാ സംവിധാനവുമായി റിലയൻസ് ഇൻഡസ്ട്രീസ് ലിമിറ്റഡിന്റെ അനുബന്ധ സ്ഥാപനമായ സ്ട്രാൻഡ് ലൈഫ് സയൻസസ്. ‘കാൻസർ സ്‌പോട്ട്’ എന്നു പേരിട്ടിരിക്കുന്ന ഈ സംവിധാനം രക്തത്തിലെ അർബുദ സൂചകങ്ങളെ കണ്ടെത്താനായി മെഥൈലേഷൻ പ്രൊഫൈലിങ് ടെക്നോളജി എന്ന ജനിതക ശ്രേണീകരണ പ്രക്രിയയാണ് ഉപയോഗിക്കുക. 

ഒന്നിലധികം കാൻസറുകൾ കണ്ടെത്താൻ ഇതിനാകും. ഇന്ത്യയുടെ ആരോഗ്യരംഗത്ത് കാൻസർ വലിയൊരു പ്രശ്‌നമായി മാറിയെന്നും ഇതിനുള്ള പരിഹാര നടപടികളിലെ ഏറ്റവും പ്രധാന ഘടകം രോഗം നേരത്തെ കണ്ടെത്തുന്നതാണെന്നും സ്ട്രാൻഡ് ലൈഫ് സയൻസസ് അധികൃതർ പറഞ്ഞു.