ടി.പി കേസ്: പരോളിൽ ഇറങ്ങിയത് 5 പ്രതികൾ

കണ്ണൂർ ∙ ടി.പി.ചന്ദ്രശേഖരൻ വധക്കേസിൽ ഹൈക്കോടതി ശിക്ഷിച്ച പ്രതികളിൽ 5 പേർക്കു കണ്ണൂർ സെൻട്രൽ ജയിലിൽനിന്നു പരോൾ ലഭിച്ചു. കിർമാണി മനോജ്, ടി.കെ.രജീഷ്, കെ.കെ.മുഹമ്മദ് ഷാഫി, കെ.ഷിനോജ്, എസ്.സിജിത്ത് എന്നിവരാണു പരോളിലിറങ്ങിയത്. കേസിലെ 9 പ്രതികളാണു കണ്ണൂർ ജയിലിലുള്ളത്. കെ.സി.രാമചന്ദ്രൻ, ട്രൗസർ മനോജ്, വാഴപ്പടച്ചി റഫീഖ്, എം.സി.അനൂപ് എന്നിവരാണ് മറ്റു 4 പേർ.

5 പ്രതികൾക്ക് ഒന്നിച്ചു പരോൾ ലഭിച്ചതു രാഷ്ട്രീയ സമ്മർദത്തെത്തുടർന്നാണെന്ന് ആക്ഷേപമുണ്ടെങ്കിലും തടവുകാർക്കു ലഭിക്കുന്ന നിയമപ്രകാരമുള്ള പരോൾ മാത്രമാണ് അനുവദിച്ചതെന്നാണ് ജയിൽ ഉദ്യോഗസ്ഥർ പറയുന്നത്. കേസിലെ 9 പ്രതികൾക്ക് 20 വർഷം തടവുശിക്ഷ പൂർത്തിയാക്കാതെ തടവിൽ ഇളവ് അനുവദിക്കരുതെന്നു ഹൈക്കോടതി ഉത്തരവുണ്ട്. കിർമാണി മനോജ്, ടി.കെ.രജീഷ്, കെ.കെ.മുഹമ്മദ് ഷാഫി, കെ.ഷിനോജ് എന്നിവർ ഇരട്ടജീവപര്യന്തം ശിക്ഷ ലഭിച്ചവരാണ്; എസ്.സിജിത്തിനു ജീവപര്യന്തവും.

തിരഞ്ഞെടുപ്പു പെരുമാറ്റച്ചട്ടത്തെത്തുടർന്ന് മാർച്ച് 17 മുതൽ തടവുകാർക്കു പരോൾ അനുവദിച്ചിരുന്നില്ല. ഈ മാസം 6ന് പെരുമാറ്റച്ചട്ടം പിൻവലിച്ച ശേഷമാണു പരോൾ അനുവദിക്കാൻ തുടങ്ങിയത്. 2 ദിവസങ്ങളിലായി ആകെ 67 പേരാണ് കണ്ണൂരിൽനിന്നു പരോളിലിറങ്ങിയത്.