വള്ളത്തോൾ കവിത പാടി സുരേഷ് ഗോപിയെ സ്വീകരിച്ച് ടി.പത്മനാഭൻ; ‘ഈ വെള്ളത്താടിയുടെ രഹസ്യമെന്താ?’

കണ്ണൂർ ∙ ‘ഈ വെള്ളത്താടിയുടെ രഹസ്യമെന്താ? കഥാകൃത്ത് ടി.പത്മനാഭൻ ചോദിച്ചപ്പോൾ ചെറുപുഞ്ചിരിയോടെ കേന്ദ്ര സഹമന്ത്രി സുരേഷ് ഗോപി പറഞ്ഞതൊരു സിനിമാക്കഥ. ‘പത്മനാഭസ്വാമിക്കു വേണ്ടിയുള്ള താടിയാണ്. ഗോകുലം ഗോപാലൻ നിർമിക്കുന്ന സിനിമയിൽ പത്മനാഭസ്വാമിയുടെ വേഷമാണ്’.

‘സിനിമയ്ക്കാണെങ്കിൽ താടി ഫിക്സ് ചെയ്താൽ പോരേ’ എന്നായി പത്മനാഭൻ. ‘അതു ശരിയാവില്ല. പത്മനാഭസ്വാമിയുടെ വേഷമാണ്. ഒറിജിനൽ തന്നെ വേണം’ എന്നു സുരേഷ് ഗോപി. 

കേന്ദ്രമന്ത്രിയായ ശേഷം കണ്ണൂരിൽ സന്ദർശനത്തിന് എത്തിയതായിരുന്നു സുരേഷ് ഗോപി. ഉച്ചയോടെയാണ് പത്മനാഭന്റെ വീട്ടിലെത്തിയത്. മഹാകവി വള്ളത്തോളിന്റെ കവിത ചൊല്ലി പത്മനാഭൻ സുരേഷ് ഗോപിയെ സ്വീകരിച്ചു. തുടർന്ന്, സിനിമയും രാഷ്ട്രീയവും മന്ത്രിപദവുമെല്ലാം കടന്നുവന്ന ചർച്ച. കൂടെ പത്മനാഭന്റെ സന്തത സഹചാരി രാമചന്ദ്രനുമുണ്ടായിരുന്നു.