മൂവാറ്റുപുഴയാറിലെ ജലനിരപ്പ് ഉയർന്നു; മൂലമറ്റത്ത് വൈദ്യുതി ഉൽപാദനം കുറച്ചു

മൂലമറ്റം ∙ മൂവാറ്റുപുഴയാറിലെ ജലനിരപ്പ് ഉയർന്നു ടൗണിൽ വെള്ളം കയറിയതിനാൽ മാത്യു കുഴൽനാടൻ എംഎൽഎ ഇടപെട്ടതോടെ മൂലമറ്റം വൈദ്യുതി നിലയത്തിൽ ഇന്നലെ ഉച്ചമുതൽ വൈദ്യുതി ഉൽപാദനം കുറച്ചു. ഇടുക്കി അണക്കെട്ടിലെ ജലനിരപ്പ് അധികം ഉയരാതെ ക്രമീകരിക്കുന്നതിനായി മൂലമറ്റം നിലയത്തിൽ വൈദ്യുതി ഉൽപാദനം ഉയർത്തിയിരുന്നു. ഇതുമൂലം മലങ്കര ജലാശയത്തിലെ ജലനിരപ്പ് ഉയർന്നു. ഡാമിൽ നിന്നു കൂടുതൽ വെള്ളം പുറത്തേക്ക് ഒഴുക്കിത്തുടങ്ങി. ഇതോടെയാണ് മുവാറ്റുപുഴ ടൗണിൽ വെള്ളം കയറിയത്. 

മാത്യു കുഴൽനാടൻ വൈദ്യുതി മന്ത്രിയും കെഎസ്ഇബി ചെയർമാനുമായി ഫോണിൽ ബന്ധപ്പെട്ടതനുസരിച്ച് ഇന്നലെ ഉച്ചമുതൽ മൂലമറ്റത്തെ വൈദ്യുതി ഉൽപാദനം കുറയ്ക്കുകയായിരുന്നു.