‘കാഫിർ’ സ്ക്രീൻഷോട്ട് പ്രചരിപ്പിച്ച റിബേഷ് ഡിവൈഎഫ്ഐ നേതാവ്
Mail This Article
കോഴിക്കോട് ∙ ലോക്സഭാ തിരഞ്ഞെടുപ്പിന്റെ തലേന്നു വടകര മണ്ഡലത്തിൽ വിവാദമായ ‘കാഫിർ’ സ്ക്രീൻഷോട്ട് പ്രചരിപ്പിച്ചതിൽ പങ്കുണ്ടെന്നു പൊലീസ് റിപ്പോർട്ടിൽ പരാമർശിക്കുന്ന വ്യക്തികളുടെ സിപിഎം ബന്ധം പുറത്ത്. പൊലീസ് ഫോൺ പിടിച്ചെടുത്തു പരിശോധനയ്ക്ക് അയച്ച റിബേഷ് രാമകൃഷ്ണൻ ഡിവൈഎഫ്ഐ വടകര ബ്ലോക്ക് പ്രസിഡന്റും ജില്ലാ കമ്മിറ്റി അംഗവുമാണ്.
വടകര ആറങ്ങോട്ട് എൽപി സ്കൂൾ അധ്യാപകനാണ്. എന്നാൽ, സംഭവത്തിൽ റിബേഷിനെ തള്ളിപ്പറയാൻ ഡിവൈഎഫ്ഐ ജില്ലാ നേതൃത്വം ഇതുവരെ തയാറായിട്ടില്ല. പകരം നേതാക്കൾക്കെതിരെ നടത്തുന്നതു കള്ളപ്രചാരണമാണെന്നും നിയമനടപടി സ്വീകരിക്കുമെന്നും നേതൃയോഗം വ്യക്തമാക്കി.
ഉറവിടം സംബന്ധിച്ചു കൃത്യമായ വിവരം നൽകാൻ വാട്സാപ് ഗ്രൂപ്പുകളുടെ അഡ്മിൻമാർ തയാറാകാത്തതിനാൽ തയാറാക്കിയവരിലേക്ക് എത്താൻ കഴിഞ്ഞില്ലെന്നാണ് പൊലീസ് ഹൈക്കോടതിയെ അറിയിച്ചിരിക്കുന്നത്. എംഎസ്എഫ് ജില്ലാ സെക്രട്ടറി മുഹമ്മദ് കാസിമിന്റെ പേരിൽ എൽഡിഎഫ് സ്ഥാനാർഥി കെ.കെ.ശൈലജയെ ‘കാഫിർ’ എന്നു വിളിച്ചു കൊണ്ടുള്ള സ്ക്രീൻഷോട്ടാണ് പ്രചരിപ്പിച്ചത്.
