‘അജ്ഞാത വാർത്താക്കുറിപ്പി’ന്റെ തലേന്ന് പൊലീസ് വെബ്സൈറ്റിൽ കണക്ക്

∙ ഡൽഹിയിലെ ചില ഇംഗ്ലിഷ് മാധ്യമങ്ങൾക്ക് 13നു ലഭിച്ച അജ്ഞാത വാർത്താക്കുറിപ്പിൽ കഴിഞ്ഞ 5 വർഷത്തെ സ്വർണക്കടത്തിന്റെയും ഹവാല ഇടപാടിന്റെയും കണക്കുണ്ടായിരുന്നു. അതിന് കൃത്യം ഒരു ദിവസം മുൻപ് കേരള പൊലീസിന്റെ വെബ്സൈറ്റിൽ 5 വർഷത്തെ ഹവാല/സ്വർണക്കടത്ത് കേസുകളുടെ വിവരങ്ങൾ പട്ടികയായി അപ്‍ഡേറ്റ് ചെയ്തു. ‘കഴിഞ്ഞ 5 വർഷത്തെ സ്വർണക്കടത്ത്, ഹവാല കേസുകളുടെ വിവരങ്ങൾ’ എന്നാണ് പേജിന്റെ തലക്കെട്ട് (ലിങ്ക്: bit.ly/klpolicestats)

സെപ്റ്റംബർ 12ന് മുൻപ് ഇങ്ങനെയൊരു പേജുണ്ടായിരുന്നതായി ഇന്റർനെറ്റ് ആർക്കൈവ്സിൽ തെളിവില്ല. അതായത്, 13ന് ഇറങ്ങിയ ‘അജ്ഞാത വാർത്താക്കുറിപ്പ്’ തൊട്ടുതലേന്ന് കേരള പൊലീസ് വെബ്സൈറ്റിൽ പ്രസിദ്ധീകരിച്ച കണക്കിന്റെ അടിസ്ഥാനത്തിലായിരുന്നു. 8 ദിവസം കഴിഞ്ഞ് സെപ്റ്റംബർ 21ന് നടന്ന വാർത്താസമ്മേളനത്തിലാണ് മുഖ്യമന്ത്രി സ്വർണക്കടത്ത്/ഹവാല കേസുകളുടെ കണക്കു പറഞ്ഞത്. അതിനും ദിവസങ്ങൾക്കു മുൻപു തന്നെ കേരളത്തിൽ സ്വർണവേട്ട ഊർജിതമാണെന്ന തരത്തിൽ പ്രതീതിയുണ്ടാക്കാൻ ശ്രമമുണ്ടായിരുന്നുവെന്നു വ്യക്തം. 21നു മുൻപു തന്നെ പല ഇംഗ്ലിഷ് മാധ്യമങ്ങളിലും ഈ കണക്ക് സംബന്ധിച്ച വാർത്തകളും വന്നു.

സ്വർണക്കടത്ത്, ഹവാല ഇടപാടുകൾ കൂടുതലും പിടികൂടുന്നതു മലപ്പുറത്താണെന്ന് വാർത്താക്കുറിപ്പിൽ പരാമർശിച്ചിട്ടുണ്ട്. നിരോധിത സംഘടനകളെ സഹായിക്കാനാണു സംസ്ഥാനത്തേക്കുള്ള ഹവാലപ്പണത്തിൽ അധികവുമെന്നാണു കരുതുന്നതെന്നും കുറിപ്പിൽ പറയുന്നു.