‘താന്തോന്നിത്തരങ്ങൾ’ ഇനിയും വേണ്ടിവരും: സുരേഷ് ഗോപി

ചേർപ്പ് ∙ സിനിമയിലെ കഥാപാത്രങ്ങളിൽ നിന്ന് ഇറങ്ങി വരണം എന്നാണ് ഇപ്പോൾ തന്നെക്കുറിച്ച് ചിലർ പറഞ്ഞു നടക്കുന്നതെന്ന് കേന്ദ്രസഹമന്ത്രി സുരേഷ് ഗോപി. എന്നാൽ, എന്തിന് സിനിമയിൽ നിന്ന് ഇറങ്ങി വരണം. തന്റെ സിനിമയിലെ താന്തോന്നിത്തരങ്ങൾ കാണിക്കുന്ന കഥാപാത്രങ്ങളെ കണ്ടിട്ടാണ് ജനങ്ങൾ തന്നെ ഇഷ്ടപ്പെട്ടത്. സിനിമയിൽ കാണിച്ച ഇത്തരം പ്രവർത്തനങ്ങൾ ഇനിയും വേണ്ടി വരും. 

എന്നാൽ അതു സാധാരണക്കാരായ ജനങ്ങളുടെ നേരെയാവില്ല, ജനങ്ങളെ ഉപദ്രവിക്കുന്ന അധികാരികൾക്കു   നേരെയാകും എന്ന് സുരേഷ് ഗോപി പറഞ്ഞു. അവിണിശേരി പ്രാഥമിക ആരോഗ്യ കേന്ദ്രം നവീകരിച്ച് കുടുംബ ആരോഗ്യ കേന്ദ്രമാക്കി ഉയർത്തുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു കേന്ദ്ര സഹമന്ത്രി.