പിഎം സൂര്യഘർ: പട്ടികയിൽ കേരളം രണ്ടാമത്

തിരുവനന്തപുരം ∙ ഗാർഹിക പുരപ്പുറ സൗരോർജ പ്ലാന്റുകൾക്ക് 78,000 രൂപ വരെ സബ്സിഡി നൽകുന്ന പിഎം സൂര്യഘർ പദ്ധതിയിൽ കേരളം രണ്ടാമത്. കേന്ദ്ര സർക്കാരും പുനരുപയോഗ ഊർജ കോർപറേഷനും പ്രസിദ്ധീകരിച്ച പട്ടികയിലാണ് കേരളം രണ്ടാമതെത്തിയത്. ആകെ അപേക്ഷകരിൽ 55.34% പേരും സൗരനിലയം സ്ഥാപിച്ചതാണ് കേരളത്തിനു നേട്ടമായത്. ഗുജറാത്ത് ആണ് പട്ടികയിൽ ഒന്നാമത്.

കഴിഞ്ഞ ഫെബ്രുവരിയിൽ പ്രധാനമന്ത്രി പ്രഖ്യാപിച്ച പദ്ധതി കെഎസ്ഇബി മുഖേന ഏപ്രിലിൽ തന്നെ ആരംഭിക്കാൻ കഴിഞ്ഞു. കേരളത്തിൽ 81,589 പേർ അപേക്ഷിച്ചതിൽ 45,152 വീടുകളിൽ സോളർ പ്ലാന്റ് സ്ഥാപിച്ചു. ആകെ 181.54 മെഗാവാട്ട് വൈദ്യുതി ഉൽപാദനം നടക്കും. 32,877 ഉപയോക്താക്കൾക്ക് 256.2 കോടി രൂപ സബ്സിഡിയായി വിതരണം ചെയ്തു.