കാർ ലോറിയിൽ ഇടിച്ച് തകർന്നു

പാമ്പാടി ∙ ശബരിമല തീർഥാടനം കഴിഞ്ഞു മടങ്ങുന്നതിനിടയിൽ നിയന്ത്രണം നഷ്ടപ്പെട്ട് കാർ‌ ടോറസ് ലോറിയിൽ ഇടിച്ചു അപകടം. ദേശീയപാത 183ൽ ചേന്നംപള്ളിയിൽ ഇന്നലെ ഉച്ചയ്ക്ക് ഒന്നിനാണ് സംഭവം. കുമരകം, ചേർത്തല സ്വദേശികളായ മൂന്നു കുട്ടികളടക്കം ആറു പേർ സഞ്ചരിച്ച വാഹനമാണ് അപകടത്തിൽ പെട്ടത്. ആർക്കും പരുക്കില്ല. ശബരിമല ദർശനം കഴിഞ്ഞു കോട്ടയം ഭാഗത്തേക്കു പോകുകയായിരുന്നു കാർ യാത്രികർ.

ചേന്നംപള്ളിയിൽ ഭാഗത്തുവച്ചു കാറിന്റെ നിയന്ത്രണം നഷ്ടമാകുകയും എതിരെ വന്ന ടോറസ് ലോറിയിൽ ഇടിക്കുകയും ആയിരുന്നു. ഡ്രൈവർ ഉറങ്ങിപ്പോയതാണ് അപകട കാരണമെന്നു പൊലീസ് പറഞ്ഞു. അപകടത്തെ തുടർന്നു ദേശീയപാതയിൽ ഗതാഗതതടസ്സം നേരിട്ടു. പാമ്പാടി പൊലീസ് സ്ഥലത്തെത്തിയാണു ഗതാഗതം പുനഃസ്ഥാപിച്ചത്.