ജില്ലാ സമ്മേളനങ്ങളിലേക്ക് സിപിഎം; കൊല്ലത്ത് ഇന്നു തുടക്കം

കൊല്ലം ∙ മധുരയിൽ ഏപ്രിലിൽ നടക്കുന്ന ഇരുപത്തിനാലാമത് പാർട്ടി കോൺഗ്രസിനു മുന്നോടിയായ ആദ്യ ജില്ലാ സമ്മേളനത്തിന് ഇന്നു കൊല്ലത്തു തുടക്കം. 12 നു സമാപിക്കും. സംസ്ഥാന സമ്മേളനം ഇക്കുറി മാർച്ച് 6 മുതൽ 9 വരെ കൊല്ലത്താണ്.

പാർട്ടി നിയന്ത്രണത്തിലുള്ള മയ്യനാട് ധവളക്കുഴിയിലെ എൻഎസ് പഠന ഗവേഷണ കേന്ദ്രത്തിന്റെ ആസ്ഥാന മന്ദിരത്തിൽ ഇന്നു രാവിലെ 10 നു പ്രതിനിധി സമ്മേളനം പൊളിറ്റ് ബ്യൂറോ അംഗം എം.എ.ബേബി ഉദ്ഘാടനം ചെയ്യും. സംസ്ഥാന സെക്രട്ടറി എം.വി.ഗോവിന്ദനു പുറമേ കേന്ദ്ര കമ്മിറ്റി അംഗങ്ങളായ എ.കെ.ബാലൻ, മന്ത്രി കെ.എൻ.ബാലഗോപാൽ, കെ.കെ.ശൈലജ, സി.എസ്.സുജാത, സംസ്ഥാന സെക്രട്ടേറിയറ്റ് അംഗങ്ങളായ ടി.പി.രാമകൃഷ്‌ണൻ, കെ.കെ.ജയചന്ദ്രൻ, എം.സ്വരാജ്, പുത്തലത്ത് ദിനേശൻ എന്നിവർ 3 ദിവസവും സമ്മേളനം നിയന്ത്രിക്കാനുണ്ടാകും. ജില്ലയിലെ 18 ഏരിയ കമ്മിറ്റികളിൽ നിന്നു തിരഞ്ഞെടുക്കപ്പെട്ട 450 പ്രതിനിധികൾ സമ്മേളനത്തിൽ പങ്കെടുക്കും. പിരിച്ചുവിടപ്പെട്ട കരുനാഗപ്പള്ളി ഏരിയയിൽ നിന്ന് ഇക്കുറി പ്രതിനിധികളില്ല. പുതിയ ജില്ലാ കമ്മിറ്റിയെയും സംസ്ഥാന സമ്മേളന പ്രതിനിധികളെയും സമ്മേളനം തിരഞ്ഞെടുക്കും. ജില്ലാ സെക്രട്ടേറിയറ്റും സമ്മേളനത്തിൽ തന്നെ രൂപീകരിക്കാനാണു സാധ്യത.