പൊലീസ് ഡ്രൈവർ തൂങ്ങിമരിച്ച നിലയിൽ

പിറവം∙ സീനിയർ സിവിൽ പൊലീസ് ഓഫിസർ ഡ്രൈവർ വീടിനുള്ളിൽ മരിച്ച നിലയിൽ. രാമമംഗലം പൊലീസ് സ്റ്റേഷനിലെ ഡ്രൈവർ മാമലശേരി എള്ളിക്കുഴിയിൽ എ.സി.ബിജു ആണു(52) മരിച്ചത്. ഇന്നലെ ഉച്ചയ്ക്കു12 മണിയോടെ മാമലശേരിയിൽ വീടിന്റെ രണ്ടാം നിലയിലേക്കുള്ള ഗോവണിയുടെ കൈവരിയിൽ സാരിയിൽ തൂങ്ങിയ നിലയിലായിരുന്നു. 

രാവിലെ ഇരുചക്ര വാഹനത്തിൽ ബിജു വീട്ടിലേക്കു പോകുന്നതു പരിസരവാസികൾ  കണ്ടിരുന്നു. ജോലിക്ക് എത്താതിരുന്നതിനെ തുടർന്നു പൊലീസ് സ്റ്റേഷനിൽ നിന്ന് ഇതിനിടെ ബിജുവിന്റെ അയൽ വീട്ടിലേക്ക് അന്വേഷണം എത്തി. മുൻ പൊലീസ് ഉദ്യോഗസ്ഥരും പരിസരവാസികളും അന്വേഷിച്ച് എത്തിയപ്പോഴാണു തൂങ്ങിയ നിലയിൽ കണ്ടത്. പിറവം താലൂക്ക് ആശുപത്രിയിൽ എത്തിച്ചപ്പോഴേക്കും മരിച്ചു. ചോറ്റാനിക്കര സ്റ്റേഷനിലും പൊലീസ് ക്യാംപിലും ജോലി ചെയ്തതിനു ശേഷം രണ്ടര  മാസം മുൻപാണു ബിജു രാമമംഗലത്ത് ജോലിയിൽ എത്തിയത്. തനിച്ചായിരുന്നു താമസം. ഭാര്യ റീന കുവൈത്തിൽ നഴ്സ് ആണ്. മക്കൾ ആൻമരിയയും അലനും ബന്ധു വീട്ടിലും. 

മരണത്തിൽ ദുരൂഹത ഇല്ലെന്നു പൊലീസ് അറിയിച്ചു. മൃതദേഹം മൂവാറ്റുപുഴ താലൂക്ക് ആശുപത്രി മോർച്ചറിയിലേക്കു മാറ്റി. സംസ്കാരം ഇന്ന് 3 നു മാമലശേരി മാർ മിഖായേൽ പള്ളിയിൽ.