പഞ്ചായത്ത് ക്ലർക്ക് തൂങ്ങിമരിച്ച നിലയിൽ; വിജിലൻസ് അന്വേഷണത്തിൽ മനോവിഷമത്തിലായിരുന്നുവെന്ന് ബന്ധുക്കൾ

വെള്ളനാട്∙ കുറ്റിച്ചൽ പഞ്ചായത്ത് ഓഫിസ് ക്ലർക്ക് വെള്ളനാട് കുളക്കോട് അനൂപ് അവന്യയിൽ അഭിനവം വീട്ടിൽ എസ്.സുനിൽ കുമാറിനെ (50) വീട്ടിൽ തൂങ്ങിമരിച്ച നിലയിൽ കണ്ടെത്തി. ചൊവ്വാഴ്ച രാത്രി 8.45ഓടെ ഭാര്യ ധന്യ ജോലി കഴിഞ്ഞ് വീട്ടിൽ എത്തിയപ്പോഴാണ്, അടുക്കളയിൽ ആത്മഹത്യ ചെയ്ത നിലയിൽ സുനിൽ കുമാറിനെ കണ്ടെത്തിയത്. മക്കൾ ഭാര്യവീടായ കൊക്കോട്ടേലയിൽ ആയിരുന്നു.

വെള്ളനാട് പഞ്ചായത്തിൽ കോവിഡ് ചികിത്സാ കേന്ദ്രം നടത്തിപ്പുമായി ബന്ധപ്പെട്ട് വിജിലൻസ് അന്വേഷണം തുടരുന്നതിൽ കഴിഞ്ഞ കുറച്ചു നാളായി മനോവിഷമത്തിൽ ആയിരുന്നു സുനിൽ കുമാറെന്ന് ബന്ധുക്കൾ മൊഴി നൽകി. കിടപ്പുമുറിയിൽനിന്ന് ഒരു കുറിപ്പ് പൊലീസിന് ലഭിച്ചു. അതിൽ കുറ്റിച്ചൽ പഞ്ചായത്തിൽ മണ്ണ് എടുക്കുന്നതിനു പാസ് നൽകുന്നതുമായി ബന്ധപ്പെട്ട കാര്യങ്ങൾ ആയിരുന്നെന്ന് ആര്യനാട് പൊലീസ് പറഞ്ഞു.

വെള്ളനാട് പഞ്ചായത്തിൽ കോവിഡ് ചികിത്സ കേന്ദ്രം നടത്തിയതുമായി ബന്ധപ്പെട്ട് വിജിലൻസ് കേസെടുത്തിൽ 5-ാം പ്രതിയായിരുന്നു സുനിൽ കുമാർ. സംസ്കാരം നടത്തി. മക്കൾ: അഭിനവ്, അഭിചന്ദ്.

(ശ്രദ്ധിക്കുക: ആത്മഹ‌ത്യ ഒന്നിനും പരിഹാരമല്ല. മാനസികാരോഗ്യ വിദഗ്‌ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പരുകൾ - 1056, 0471- 2552056)