3 മിനിറ്റ്, ജൂവലറി കാലിയാക്കി 20 അംഗ മോഷണ സംഘം; യുഎസിലെ പകൽക്കൊള്ള– വിഡിയോ

കലിഫോർണിയ ∙ കണ്ണടച്ചു തുറക്കും വേഗത്തിൽ ജുവലറി കൊള്ളയടിച്ച് ഇരുപതംഗ സംഘം. പുണെ ആസ്ഥാനമായ പിഎൻജി ജ്വല്ലേഴ്സിന്റെ അമേരിക്കയിലെ ഷോറൂമിലാണു മിനിറ്റുകൾക്കുള്ളിൽ പകൽക്കൊള്ള നടന്നത്. 

മുഖംമൂടി ധരിച്ച 20 മോഷ്ടാക്കൾ കലിഫോർണിയയിലെ സണ്ണിവെയ്‌ലിലുള്ള ഷോറൂമിലേക്ക് ചില്ലുവാതിൽ തകർത്ത് ഇരച്ചുകയറുകയായിരുന്നു. ഈ സമയം ഒരു സുരക്ഷാ ജീവനക്കാരൻ മാത്രമാണു ഷോറൂമിലുണ്ടായിരുന്നത്. ഇയാളെ കീഴ്പ്പെടുത്തിയ സംഘം ജുവലറിയിലെ പ്രദർശന അലമാരകളുടെ ചില്ലുകൾ തകർത്ത് ആഭരണങ്ങൾ കവർന്നു. 

3 മിനിറ്റിനുള്ളിൽ ജുവലറി കാലിയാക്കി കവർച്ചസംഘം കടന്നുകളഞ്ഞു. ജൂവലറിയെ കുറിച്ച് നന്നായി അറിയാവുന്നവരാണ് കവർച്ചയ്ക്കു പിന്നിലെന്നാണ് മോഷണരീതി പരിശോധിക്കുമ്പോൾ മനസ്സിലാകുന്നതെന്ന് യുഎസിലെ പ്രാദേശികമാധ്യമങ്ങൾ റിപ്പോർട്ട് ചെയ്തു. 5 പേർ അറസ്റ്റിലായി. സംഭവത്തിന്റെ സിസിടിവി ദൃശ്യങ്ങൾ വ്യാപകമായി പ്രചരിക്കുന്നുണ്ട്. പുരുഷോത്തം നാരായൺ ഗാഡ്കിൽ സ്ഥാപിച്ച ജൂവലറി ശൃംഖലയാണ് പിഎൻജി. ഇവർക്ക് ഇന്ത്യയിലും യുഎസിലും ദുബായിലുമായി 35 ഷോറൂമുകളുണ്ട്.