കൂടോത്രം വിഡിയോയുടെ ഉറവിടം പറഞ്ഞാൽ പ്രതികരിക്കാം; അല്ലെങ്കിൽ ‘കമാ’ എന്ന് മിണ്ടരുത്: രാജ്മോഹൻ ഉണ്ണിത്താൻ
Mail This Article
കാസർകോട്∙ കെപിസിസി അധ്യക്ഷന്‍ കെ.സുധാകരന്‍ എംപിയുടെ വീട്ടുപറമ്പില്‍നിന്നു കൂടോത്ര അവശിഷ്ടങ്ങള്‍ കണ്ടെടുക്കുന്ന വിഡിയോയുടെ ഉറവിടം വെളിപ്പെടുത്താതെ പ്രതികരിക്കാനില്ലെന്ന് രാജ്മോഹൻ ഉണ്ണിത്താൻ എംപി. ഉറവിടം വെളിപ്പെടുത്തിയാൽ താന്‍ എല്ലാം വിശദീകരിക്കാമെന്ന നിലപാടാണ് ഉണ്ണിത്താന്റേത്.
‘‘ആരാണ് വിഡിയോ തന്നതെന്ന് പറഞ്ഞാല്‍ സകല കാര്യങ്ങളും വിശദീകരിക്കാം. നിങ്ങള്‍ക്ക് ഈ സാധനം എവിടുന്ന് കിട്ടിയെന്ന് പറയൂ. അല്ലെങ്കില്‍ കമ എന്ന് മിണ്ടരുത്’’ എന്നായിരുന്നു ഉണ്ണിത്താന്റെ പ്രതികരണം. പറഞ്ഞകാര്യങ്ങളൊന്നും ജീവിതത്തില്‍ ഒരിക്കലും പിന്‍വലിച്ചിട്ടില്ലെന്നും രാജ്‌മോഹന്‍ ഉണ്ണിത്താന്‍ പറഞ്ഞു.
കെപിസിസി അധ്യക്ഷൻ കെ.സുധാകരന്റെ വീട്ടിൽനിന്നു കൂടോത്ര അവശിഷ്ടങ്ങള്‍ പുറത്തെടുക്കുന്ന ഒന്നരവർഷം മുൻ‌പുള്ള വിഡിയോ കഴിഞ്ഞദിവസമാണ് പുറത്തുവന്നത്. ഇത്രയും ചെയ്തിട്ടും താന്‍ ബാക്കിയുണ്ടല്ലോയെന്ന് സുധാകരന്‍ ഉണ്ണിത്താനോട് പറയുന്നത് വിഡിയോയില്‍ കേള്‍ക്കാം. തനിക്ക് കൂടോത്രത്തില്‍ വിശ്വാസമുണ്ടെന്നും സൂക്ഷിക്കണമെന്നും ഉണ്ണിത്താന്‍ നിര്‍ദേശവും നല്‍കുന്നുണ്ട്.