ഹോർത്തൂസ് അക്ഷരപ്രയാണം ഫ്ലാഗ്ഓഫ് ചെയ്തു; എല്ലാ ജില്ലകളിലൂടെയും സഞ്ചരിച്ച് കോഴിക്കോട്ട് സമാപനം

കോട്ടയം ∙ മലയാള മനോരമ നവംബർ 1, 2, 3 തീയതികളിൽ കോഴിക്കോട്ട് ഒരുക്കുന്ന ഹോർത്തൂസ് സാഹിത്യ സാംസ്കാരിക ഉത്സവത്തിന്റെ സന്ദേശവുമായുള്ള അക്ഷരപ്രയാണത്തിന് തുടക്കമായി. മലയാള മനോരമ അങ്കണത്തിൽ രാവിലെ 9.30ന് ചീഫ് എഡിറ്റർ മാമ്മൻ മാത്യു ഫ്ലാഗ് ഓഫ് ചെയ്തു. പ്രയാണത്തിലേക്കുള്ള ആദ്യത്തെ അക്ഷരം എഴുത്തുകാരനും ഹോർത്തൂസ് ഡയറക്ടറുമായ എൻ.എസ്.മാധവൻ കൈമാറി. 

കേരളത്തിലെ എല്ലാ ജില്ലകളിലെയും തിരഞ്ഞെടുത്ത സാഹിത്യ സാംസ്കാരിക കേന്ദ്രങ്ങൾ, വിദ്യാഭ്യാസ സ്ഥാപനങ്ങൾ, വായനശാലകൾ എന്നിവിടങ്ങളിലൂടെ അക്ഷരപ്രയാണം സഞ്ചരിക്കും. സ്വീകരണ കേന്ദ്രങ്ങളിൽനിന്നു ശേഖരിക്കുന്ന മലയാള അക്ഷരങ്ങളുടെ ചെറുമാതൃകകൾ ഹോർത്തൂസ് ഉത്സവത്തിനു മുന്നോടിയായി കോഴിക്കോട്ടെ പ്രധാന വേദിയിൽ സ്ഥാപിക്കും. വായനയുടെയും എഴുത്തിന്റെയും വഴികളിലേക്കു വെളിച്ചം വീശുന്ന പരിപാടികളും ഒരുക്കും.

‘അക്ഷരപ്രയാണം’ ഇന്നു ജില്ലയിലെ മൂന്നു കലാലയങ്ങളിൽ പര്യടനം നടത്തും. സിഎംഎസ് കോളജ്, മാന്നാനം കെഇ കോളജ്, ഏറ്റുമാനൂരപ്പൻ കോളജ് എന്നിവിടങ്ങളിലാണ് അക്ഷരപ്രയാണം എത്തുക. കോഴിക്കോട്ടെ പ്രധാനവേദിയിൽ സ്ഥാപിക്കുന്നതിനു കലാലയങ്ങളിൽനിന്നു മലയാള അക്ഷരങ്ങളുടെ ചെറുമാതൃകകൾ സ്വീകരിക്കും.

രാവിലെ 10നു സിഎംഎസ് കോളജിൽ പ്രിൻസിപ്പൽ ഡോ. അഞ്ജു ശോശൻ ജോർജിന്റെ നേതൃത്വത്തിൽ വരവേൽപു നൽകും. ഇംഗ്ലിഷ് അധ്യാപകൻ ഡിറ്റോ പ്രസാദിന്റെ നേതൃത്വത്തിൽ വിദ്യാർഥികൾ നടത്തുന്ന സാംസ്കാരിക പരിപാടികളും ഉണ്ടാകും.

11.45നു മാന്നാനം കെഇ കോളജിൽ പ്രിൻസിപ്പൽ ഡോ. ഐസൺ വി.വഞ്ചിപ്പുരയ്ക്കലിന്റെ നേതൃത്വത്തിൽ പ്രയാണത്തെ സ്വീകരിക്കും. അധ്യാപകരായ ഡോ. വിനു വി.ജോർജ്, ചിഞ്ചു റാണി വിൻസന്റ് എന്നിവരുടെ നേതൃത്വത്തിൽ വിദ്യാർഥികൾ കലാപരിപാടികൾ അവതരിപ്പിക്കും.

ഉച്ചയ്ക്കു 2ന് ഏറ്റുമാനൂരപ്പൻ കോളജിൽ പ്രിൻസിപ്പൽ ഹേമന്ത് കുമാറിന്റെ നേതൃത്വത്തിൽ സ്വീകരണം. അധ്യാപകരായ മീരാ മുകുന്ദൻ, മായാ കെ.നായർ എന്നിവരുടെ നേതൃത്വത്തിൽ വിദ്യാർഥികൾ അവതരിപ്പിക്കുന്ന സാംസ്കാരിക പരിപാടികളും അരങ്ങേറും.

സാന്റാ മോണിക്ക സ്റ്റഡി എബ്രോഡ് പ്രൈവറ്റ് ലിമിറ്റഡ്, ജെയിൻ യൂണിവേഴ്സിറ്റി, ജോയ് ആലുക്കാസ് തുടങ്ങിയവരാണ് സ്പോൺസർമാർ.

സമകാലിക വിഷയങ്ങളിലേക്ക് ആഴത്തിൽ ആഴ്ന്നിറങ്ങുന്ന സംഭാഷണങ്ങളിൽ പങ്കാളിയാകാൻ ഇപ്പോൾ തന്നെ റജിസ്റ്റർ ചെയ്യാം. സൗജന്യമായി റജിസ്റ്റർ ചെയ്യുന്നതിന് https://manoramahortus.com എന്ന ഔദ്യോഗിക വെബ്സൈറ്റ് സന്ദർശിക്കുക. സ്പീക്കർമാരുടെ ലിസ്റ്റും വെബ്സൈറ്റിൽ ലഭ്യമാണ്.