ശബരിമലയിൽ മൂന്നു തീർഥാടകർ കുഴഞ്ഞുവീണു മരിച്ചു

പത്തനംതിട്ട∙ ശബരിമല ദർശനത്തിനെത്തിയ മൂന്ന്‌ തീർഥാടകർ മല കയറുന്നതിനിടെ കുഴഞ്ഞുവീണു മരിച്ചു. ആന്ധ്രാപ്രദേശ്‌ സ്വദേശികളായ ‌വേൽപ്പുരി വെങ്കയ്യ (65), നീലം ചന്ദ്രശേഖർ (55), ബെംഗളൂരു സ്വദേശി  സി.പി.കുമാർ (44) എന്നിവരാണ്‌ മരിച്ചത്‌.  

‌വേൽപ്പുരി വെങ്കയ്യയ്ക്ക് നീലിമലയിൽ വച്ച്‌ ബുധൻ രാത്രി 8.47ന്‌ നെഞ്ചുവേദന ഉണ്ടായതിനെ തുടർന്ന്‌ പമ്പാ ആശുപത്രിയിൽ എത്തിച്ചെങ്കിലും മരിച്ചു. വ്യാഴം പുലർച്ചെ 3.23ന് അപ്പാച്ചിമേട്ടിൽ വച്ചാണ് സി.പി.കുമാർ അസ്വസ്ഥത പ്രകടിപ്പിച്ചത്. തുടർന്ന് അപ്പാച്ചിമേട്‌ കാർഡിയോളജി സെന്ററിൽ എത്തിച്ചെങ്കിലും രക്ഷിക്കാനായില്ല. വ്യാഴാഴ്ച പമ്പ ഒന്നാം നമ്പർ ഷെഡിൽ വച്ചാണ് നീലം ചന്ദ്രശേഖറിന് ദേഹാസ്വാസ്‌ഥ്യം ഉണ്ടായത്. തുടർന്ന്  പമ്പ ഗവ. ആശുപത്രിയിൽ എത്തിച്ചെങ്കിലും മരിച്ചു.