‘ദേവേന്ദ്ര’ ഭരണത്തിന് നാളെ തുടക്കം; ക്ഷണിച്ച് ഗവർണർ, സത്യപ്രതിജ്ഞ വൈകിട്ട് 5.30ന്

മുംബൈ∙ മഹാരാഷ്ട്രയിൽ ബിജെപി നേതാവ് ദേവേന്ദ്ര ഫഡ്നാവിസ് വ്യാഴാഴ്ച മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേൽക്കും. വൈകിട്ട് 5.30ന് സത്യപ്രതിജ്ഞ നടക്കുമെന്ന് ഫഡ്നാവിസ് വാർത്താസമ്മേളനത്തിൽ അറിയിച്ചു. ഇന്ന് മഹായുതി നേതാക്കൾ മഹാരാഷ്ട്ര ഗവർണർ സി.പി.രാധാകൃഷ്ണനെ കണ്ടിരുന്നു. പിന്നാലെയാണു ഫഡ്നാവിസിനെ സർക്കാർ രൂപീകരിക്കാനായി ഗവർണർ ക്ഷണിച്ചത്.

മഹാരാഷ്ട്രയുടെ അടുത്ത മുഖ്യമന്ത്രിയായി ദേവേന്ദ്ര ഫഡ്നാവിസിനെ ബിജെപി നിയമസഭാ കക്ഷിയോഗം ഏകകണ്ഠമായി തിരഞ്ഞെടുത്തിരുന്നു. ആശിഷ് ഷേലർ നിയമസഭയിൽ ബിജെപിയുടെ ചീഫ് വിപ്പാകും. ഫഡ്നാവിസിന്റെ വസതിക്കുപുറത്ത് പാർട്ടി പ്രവർത്തകർ ആഹ്ലാദപ്രകടനം നടത്തി. 

സത്യപ്രതിജ്ഞാ ചടങ്ങുകൾക്കുള്ള ഒരുക്കങ്ങൾ ആസാദ് മൈതാനത്ത് പുരോഗമിക്കുകയാണ്. തന്നെ മുഖ്യമന്ത്രിയായി തിര‍ഞ്ഞെടുത്തതിന് പ്രധാനമന്ത്രി നരേന്ദ്ര മോദിക്കു ഫഡ്നാവിസ് നന്ദി അറിയിച്ചു. മഹാരാഷ്ട്രയിൽ ഒട്ടേറെ വികസന പ്രവർത്തനങ്ങൾ കൊണ്ടുവരുമെന്നും പറഞ്ഞു.